Shillong, Naiwieng 28
U Vice Chancellor ka North-Eastern Hill Uni-versity (NEHU), Prof. Prabha Shankar Shukla, u la pyntip sha ka Ministry of Education ba un leit ban shimti biang ïa ka shuki VC ha ka 2 tarik u Nohprah.
Wat hapdeng ka jingpyrshah jong kiba bun ba un wanphai biang sha ka skulbah, hynrei na ka liang u Prof. Shukla u la pyntip ba un shimti ïa ka shuki VC ha ka 2 tarik Nohprah hadien ba ka shuti kaba u la shim kan kut noh ha ka Sngi Thohdieng. Nalor ka jingpyntip ban shimti biang ïa ka shuki, u Prof. Shukla u la pan na ka bor ai jingïada ïalade na ka Sorkar Pdeng da kaba pynpaw ruh ba ka bor pahara ba la pynbiang da ka Sorkar Jylla kam da biang than.
Ïa kane, u Prof. Shukla u la pyntip lyngba ka shithi kaba u la phah sha u Principal Secretary in-charge Higher Education, ka Sorkar Pdeng, bad ha kaba u la ong, “Ka jingshim shuti ka jong nga kan kut ha ka 29.11.2024 bad ngan leit ban shimti biang ïa ka kam ha NEHU ha ka 02.12.2024.”
Halor ki jingtip kiba la pan da ka Ministry bad ïa kaba la phah sha u Principal Secretary jong ka Higher Education, ka Sorkar Pdeng, u Prof. Shukla ha ka Sngi Balang u la ong ba ha kaba ïadei bad ka jinglong jingman hapoh ka NEHU campus, u la kyrpad ïa bor pahara kaba jur na ka Sorkar Pdeng, naba ka bor pahara kaba la pynbiang da ka Sorkar Jylla kam pat biang satia.
Shuh shuh u la ong, “Kane ka jingai bor pahara ym tang ba kan pynthikna ïa ka jinglong shngaiñ ka jong nga hynrei ruh kumjuh ïa ka jingshngaiñ jong ka campus ka NEHU baroh bad kumjuh ruh jong ki nongtrei.”
Shuh shuh u la kynnoh, “Nga la ïoh ïa ka jingtip ba ki riewshimkabu na ki kynhun bapher-bapher jong ka skulbah, lyngba u In-charge Vice Chancellor, kila pynïaid beaiñ ïa ki kam ki jam kiba manla ka sngi jong ka skulbah bad kila pynmih ïa ki hukum bad ki jingpynbna khlem ka jingïoh bor”.
“Namar ka jinglong-jingman ka bym shngaiñ hapoh ka skulbah, nga kyrpad ban ai ïa ka bor jingïada kaba pura namar ka jingai jingïada na ka Sorkar Jylla kam pat biang,” u la ong.
U la pyntip ba u la aiti ïa ki jingthoh ryngkat bad ka jingpynshai ïa ki 4 tylli ki mat kiba la pan jingpynshai da ka Ministry of Education ha ka 23.11.2024.
Haba batai bniah shaphang ka jingjia, u Prof. Shukla u la ong, “Ka NEHU Students’ Union (NEHUSU), kaba la kyrshan da ka NEHU Teachers’ Association (NEHUTA) hapoh ka jingïalam u Prof. Lakhon Kma ka la pynmih ïa ka huri-hura hapoh ka skulbah naduh ka 25 tarik u Risaw 2024.”
U la kynnoh ba ka NEHUTA ka la pynmih ïa ka jingkulmar hashwa ban sdang ka jingïalang jong ka Academic Council kaba 113 ha ka 25 tarik u Risaw, 2024 ha kaba kam shym la shah ïa ka jingïalang jong ka Academic Council.
“Hadien katei, ki la leit rung jubor ha ka ophis jong u Registrar bad Deputy Registrar bad ki la phah mih jubor ïa ki bad khang tala ïa ka ophis treikam ka jong ki. Ki la leit rung jubor ruh ha ka ophis jong u Vice Chancellor bad ki la byrngem ïa nga ba nga dei ban wengkam mardor ïa u Registrar and Dy. Registrar. Ym shim la don kano-kano ka kynhun ban ujor ne pynsngew eiei ne ban ai da ka jingthoh ban batai ïa ki daw ban weng noh ïa kitei ki ophisar,” u la ong.
“Watla katta ruh nga la pyrshang ban batai bniah ïa ki kyndon treikam bad pynthikna ïa ki ba yn sa leh ïa kaba donkam ban pynbeit ïa katei ka mat bad ban pynjaijai ïa ka jinglong jingman. Katkum ka jingdawa ka jong ki, nga la dep ruh ban thung ïa u Pro-VC, uwei na ka bynta kawei pa kawei ka NEHU campus bad pan ïa ka jingmynjur na ka EC katkum ki kyndon jong ka NEHU Act 1973,” la ong u Prof Shukla.
U Prof Shukla u la ong ruh, “Wat la nga la pyrshang ban ïakynduh bad ban ïakren na ka bynta ban pynbeit ïa ka jingeh, ka NEHUSU bad NEHUTA ki la nang pynheh ïa ka jingïakhih da kaba pynlong ïa ka jingshah thngan hakhmat ka ophis treikam jongu VC bad ki la khang ïa baroh ki khyrdop ban rung shapoh ka skulbah. Kim shym la ai ïa kano-kano ka byrta da ka jingthoh shaphang ka jingshah thngan. Nga la pyntip sha ki bor kiba dei khmih shaphang katei ka jingïakhih, kynthup ïa ka DC bad SP, ryngkat bad ïa ka DGP bad u Chief Secretary ka jylla bad nga la pan ïa ka jingïarap na ki ban pynthikna ba kan don ka jingshngaiñ hapoh ka skulbah NEHU”.
“Wat la kitei ki ar tylli ki kynhun ki la byrngem ïa nga ha ka jingwan thombor ïa ka ïing sah ka jong nga. Namar ka jingjia kaba la kdew haneng bad ka jingthut kaba la pynmih da kitei ki ar tylli ki kynhun, ki kam ki jam ha ka skulbah ki la sangeh bad sahkut lut. Ki nongtrei jong ka skulbah ki la shah pynsangeh ban pyndep ïa ki kamram ka jong ki bad ki la sheptieng bad kim sngew shngaiñ hapoh ka skulbah,” u la pyntip.
Ka NEHUSU, NEHUTA, NEHUNSA bad KSU ki la dawa ba dei ban weng noh mardor ïa u. Ki la pynpaw ïa katei hakhmat ka Committee jong ar ngut kaba la thung da ka Ministry of Education ba ka jingwanphai biang ka jong u Prof. Shukla kan long kaei-kaei kaba kin ym lah ban pdiang.
