Ranchi, Naiwieng 28 (UNI)
U Hemant Soren ha ka Sngi Palei u la bam smai kum u Myntri Rangbah ka Jharkhand ha ka sien ba saw ha ka jingïalang bah kaba la long ha Madan Morhabadi ha ryngkat ka jingdonlang jong bun ngut ki nongïalam saiñ pyrthei ka ri.
U Lat ka Jharkhand, u Santosh Kumar Gangwar u la pyntian smai ïa u nongïalam ba 49 snem jong ka Jharkhand Mukti Morcha (JMM), uba la ïalam ïa ka INDIA Bloc sha ka jingjop ha kane ka ilekshon ba dang shen sha ka ïingdorbar thawaiñ.
U Soren u la shim smai ha ka ktien Hindi.
Napdeng kito kiba la don lang ha ka jingïalang tian smai ki long ki nongïalam ba hakhmat jong ka INDIA Bloc ba kynthup ïa u President ka Congress, u Mallikarjun Kharge, nongïalam ka liang pyrshah ka Lok Sabha, u Rahul Gandhi, u Symbud Myntri Rangbah barim ka Bihar, u Tejashwi Yadav, Myntri Rangbah ka West Bengal, ka Mamata Banerjee, Myntri Rangbah barim ka Delhi, u Arvind Kejriwal, Myntri Rangbah ka Punjab, Bhagwant Mann bad u Myntri Rangbah barim ka Uttar Pradesh, u Akhilesh Yadav.
U kpa u Soren – nongseng ka JMM bad Myntri Rangbah barim ka Jharkhand, u Shibu Soren u la don lang ha kane ka sngi. Ka kurim u Shibu Soren bad kmie u Hemant, ka Rupi Soren ruh ka la ïashim bynta lang ha ka jingïalang.
