Shillong, Naiwieng 28
U MLA ka Voice of the People Party (VPP) na Mawryngkneng, Bah Heavingstone Kharpran ha ka Sngi Palei u la kyrpad ïa ka Sorkar Jylla lyngba ka tnad PWD ban pynsted noh ha ka ban shna ïa ka jingkieng kaba pynïasoh ïa ka shnong Jyntah bad Happy Valley na bynta ka jingmyntoi jong ki nongshong shnong ka thaiñ.
“Ngi ïoh ban jurip ïa ka Wah Umkhen bad ngi don lang ïa ki Engineer ka tnad PWD (PMGSY), Rangbah Shnong ka Jyntah, ki nongïalam Balang nalor kiwei-kiwei. Ngi wan ban peit ïa kane ka jaka kaba na ka liang jong ngi naduh ki por mynshuwa…ngi la ïakynduh ïa u Symbud Myntri Rangbah ka Jylla ka tnad PWD kumjuh ïa ki Engineer (ka tnad) na ka por sha ka por ryngkat ka jingthoh ba la dei por ban shna noh ïa kane ka jingkieng ka ban pynïasoh ïa ka shnong Jyntah bad ka Happy Valley,” ong u Bah Kharpran.
U MLA u la pynkynmaw ba u la pynsngew ruh ïa kane ka mat hapoh ïingdorbar thawaiñ ha u snem ba la dep bad na ka liang u Symbud Myntri Rangbah ka Jylla ba khmih ïa ka tnad PWD, u la kular ban leh eiei noh ïa kane hynrei mynta la shi snem tam, ym pat i don dak haba ïadei bad kane ka bynta.
“Katba nga sngewthuh, ha ka jingshisha la dep ban jurip bad mynta kaba sah dei sa tang ka jingmang. Haba ngi peit, ngi la donkam shisha ïa kane ka jingkieng namarba bun ki briew kiba ïaid nangne, kiba wan na sor ban leit sha Jowai bad kiba wan na thaiñ Jowai, Sohryngkham, Mawryngkneng ruh ki ïaid lyngba nangne,” u la ong da kaba bynrap ba lada don kane ka jingkieng, kan ïarap shibun bad pynsuk ïa ki paidbah kiba ïaid lynti na kane ka jaka.
Haba kdew ba ka don ruh ka jingma ha ka por lyiur namar ka jingkiew jong ka um khamtam ïa ki khynnah skul ne paidbah kiba ju ïaid lyngba kane ka jaka, u Bah Kharpran u la ong ba na ka por sha ka por, u la pynsngew ïa ki bor ba dei peit ban leh noh kham kloi bad kyrmen skhem ba ka tnad ba dei khmih kan shimkhia ïa kane ban pynsted noh ha ka ban mang ïa kane ka jingkieng khnang ban pynsuk ïa u paidbah babun balang.
“Nga kyrpad ruh ïa ka Sorkar ban pynheh ïa ka surok ha kane ka bynta naba nga ïohi ba ka khim palat ba hadien ba la dep ka jingkieng, kin bun ki briew, ki kali ki ban ïaid nangne bad lada ka khim palat kumba ka long mynta, kan ktah ïa ka ïaid ka ïeng jong ki nongshong shnong,” u la ong.
Shuh shuh u MLA u la bynrap ba u la ïoh ruh ban jurip ïa katei ka bynta jong ka surok ba la shna da ka PMGSY (kumba 200 mitar), bad u la shem ba ka long kaba khohruh-khohram bad namarba kan don ka jingïaseng heh jong kawei ka Balang ha u bnai Rymphang, u la kyrpad ïa ki Engineer jong ka PWD ba kin leh noh kham kloi haba ïadei bad katei ka kam khnang ban ïoh pyndep noh ha ka por kaba biang.
