Shillong, Naiwieng 28
U Symbud Myntri Rang-bah ka Jylla, Bah Prestone Tynsong ha ka Sngi Palei u la buh ïa u mawnongrim ban kyntiew kyrdan ïa ka Pynursla CHC sha ka Sub- Divisional Hospital ha ka jingdonlang ka Dr. Ampa-reen Lyngdoh, Myntri ba dei peit ïa ka tnad ka koit ka khiah kaba la long ha Pynursla Community Health Centre (CHC), East Khasi Hills District.
Ha kane ka sngi la plie paidbah ruh ïa ka First Referral Unit (FRU) ha Pynursla CHC.
U Bah Prestone Tynsong haba kren kum u Kongsan u la pynpaw ïa ka jingangnud jong ka Sorkar Jylla ban kyntiew ïa ki jaka sumar ha kylleng ka Jylla.
U la pynpaw ba ka jingpynkiew kyrdan ïa ka Pynursla CHC sha ka Sub-Divisional Hospital kan kyntiew shibun ïa ka jingïoh jingsumar na ka bynta ki nongshong shnong bad kito kiba don ha ki thaiñ marjan.
“Kane ka sienjam ka long katkum ka jingthmu jong ka Sorkar Jylla ban pynbha ïa ki jaka sumar, kaba don ha ka kyrdan kaba ar ha ka mang tyngka hadien ka pule-puthi bad ka jingpynroi ïa ki jingtei,” u la ong.
U la kyntu ïa baroh ki nongshim bynta bad ki paidbah ban ïatreilang ha ka ban weng ïa ki jingeh ha ka koit ka khiah bad ban pynbha ïa ka jinglong-jingman jong ka koit ka khiah baroh kawei.
U la ban jur ïa ka jingdonkam jong ka koit ka khiah bad u la ai khublei ïa ka jingtrei shitom jong ki doktor, ki nos bad ki nongtrei ka koit ka khiah, khamtam ha ki jaka nongkyndong.
U la pynshlur ïa ki paidbah nongshong shnong ka Pynursla ba kin pynrung kyrteng ïalade na ka bynta ka Meghalaya Health Insurance Scheme (MHIS) bad ban pynïasoh bad ki ‘Aadhaar Card’ jong ki khnang ba kin ïoh ïa ki jingmyntoi na ka koit ka khiah jong ka Sorkar.
U la kyntu ïa ki paidbah ban weng noh ïa ki jingngeit biej bad ban pdiang ïa ka jingkylla kaba bha na ka bynta ka roi ka par jong ka thaiñ.
Ka Myntri ka Koit ka Khiah, ka Dr. M. Ampareen Lyngdoh haba ai jingkren ha kane ka jingïalang ka la ong ba kaba kongsan jong kane ka Sub-Divisional Hospital ba la pynbha thymmai ha kaba ai ka jingsumar kaba kham bha ïa ki paidbah.
Ka la batai ba ka ‘hospital’ kan ai ïa baroh ar ki tnad ba sumar hapoh bad shabar, ban pyntikna ïa ka jingsumar pang kaba pura.
Ka la ong ba ka First Referral Unit (FRU) kaba la plie thymmai kan ai ka jingsumar ba kyrpang kaba 24 kynta ha ka liang ka jingsumar. Kane ka jaka kan pynduna ïa ka jingdonkam jong ki nongpang ban leit sha jngai ban ïoh jingsumar.
Ka Myntri ka Koit ka Khiah ka la pynpaw ïa ka jingkmen jong ka halor ka jaka buh snam ka ban sa treikam noh shen ha katei ka hospital.
Ka la ban jur ïa ka jingthmu jong ka Sorkar ban pynduna ïa ka jingïap jong ki khyllung bad ka la ban jur ïa ka jingdonkam ban kha khun da kaba shngaiñ ïa ki longkmie kiba armet.
Ka la ban jur ba ki ‘hospital’ Sorkar ki lah ban ai ka jingsumar kaba paka bad ka la pynshlur ïa ki paidbah ban pyndonkam ïa ki jingshakri kiba don ha ki jaka sumar ba marjan.
Kiwei pat kiba la donlang ha kane ka sngi ki long u Sampath Kumar, Principal Secretary ka tnad Health & Family Welfare ka Sorkar Jylla, u Dr. Lyngdoh, Rangbah Shnong, Urksew Wahpathaw, Pynursla bad kiwei pat.
