Shillong, Naiwieng 28
U Bah A.L Hek uba dei u Nongïalam ka BJP bad ruh u Myntri ka Sorkar Jylla u la pyntip ba ka Sorkar Pdeng mynta ka dang ap ïa ka kaiphod jong ka komiti na ar ngut ki dkhot kaba tohkit ïa ka jingkynnoh pyrshah ïa u Vice Chancellor ka skulbah NEHU u Prof. P.S Shukla ba u pynïaid bakla bad bym nang treikam ha shuwa ban shim rai ïa ka kam.
U Bah Hek u la pyntip ïa kane ha ka Sngi Palei, hadien ba ka kynhun na ka BJP-Meghalaya, hapoh ka jingïalam ka jong u, dang shen ka la leit ïakynduh ïa u Myntri Khynnah ka Ministry of Education ha New Delhi.
“Ngi la ïoh ban pynsngew bad batai ha utei u Myntri bad ruh ban ai ïa ka shithi halor ka kam ba ïadei bad ka NEHU. Ki la tip shai bha halor kane ka kam bad ki la phah ïa ar ngut ki dkhot ban tohkit ïa kane ka kam. Ki dang ap mynta ïa ka kaiphod,” ong u Bah Hek.
“Katkum ka jingtip jong nga, ka komiti ka la dep pynkhreh ïa ka kaiphod hynrei kan dang ban aiti sha ka Ministry,” u la ong.
Shuh shuh u Bah Hek u la ong, jan baroh ki kynhun napoh ka skulbah naduh ki samla pule (NEHUSU), ki Nonghikai (NEHUTA & MeTTA) bad ki Nongtrei (NEHUNSA) ki la aiti ïa la ki mudui pyrshah ïa une u VC ba mynta.
“Kumta lada ki jingkynnoh kine ki kynhun ka dei kaba shisha, lada phi dang buh ïa ujuh u VC, ki kam ki jam kin ym long shuh kiba ïaid beit ïaid ryntih ha NEHU,” u la ong.
Baroh kine ki kynhun na NEHU ki la ïakynduh ïa ka komiti jong ar ngut ki dkhot ba la thung da ka Ministry of Education bad phah ïa ka khubor sha ka Sorkar Pdeng ba ka jingwanphai jong u VC ba mynta kan dei ka bym lah satia ban pdiang.
