Shillong, Naiwieng 28
Ka Jylla ka la dep pynkhreh ïa ki Detailed Project Report (DPR) kumba 12 tylli ki projek barit bad lyngba kine ki projek yn lah ban pynmih bording ilektrik kumba 63 mega watt.
Ïa kine ki DPR la pynkhreh da ka Meghalaya Energy Corporation Limited (MeECL) bad kaba donkam mynta ka long ban ïoh jingïarap pisa na ka Sorkar Pdeng lyngba ka Ministry of New and Renewable Energy.
Ka tyllong khubor ka ïathuh ba ki don lypa ym duna ïa ka 25 tylli ki projek barit kiba la buhthong ba kin pynmih bording kumba 160 mega watt.
La ong ba lada ka Sorkar Pdeng ka kloi ban ïarap bei pisa kan long ka jingïarap ïa ka Jylla ba kan lah ban pyntrei ïa kine ki projek.
Dang shen, u Myntri ka tnat bording ka Jylla, u AT Mondal u la pynsngew ha u Myntri ka tnat bording ka Sorkar Pdeng u ML Khattar halor ka jingpynkhreh ïa ki projek bording barit ha kane ka Jylla bad ki don ruh ki projek kiba la dep ban pynkhreh DPR bad kiba lah ruh ban sdang pyntrei noh.
Namar ka jingduna pisa bad donkam ka jingkyrshan, u Mondal u la kyrpad ïa ka Ministry New and Renewable Energy ka Sorkar Pdeng ban sdang biang ïa ka Central Financial Assistance kaba T. 7.5 klur shi mega watt na ka bynta ban shna ïa ki projek bording barit khnang ba ki jylla barit kum ka Meghalaya kin ïoh jingmyntoi.
Na ka liang u Secretary ka tnat New and Renewable Energy ka Sorkar Pdeng u la wan ruh sha Shillong na ka bynta ban ïatai ïa ki jingeh jong ki Jylla ka Thaiñ Shatei Lam Mihngi bad na ka liang ka Jylla ka la pynsngew ïa kane ha ka jingïakynduh lang jong ki Jylla na Thaiñ Shatei Lam Mihngi ha kane ka Jylla kaba la long ha ka 27 tarik bad 28 tarik mynta u bnai.
