Nongstoiñ, Naiwieng 28
Wat lada ki nongrep ha ki bynta jong ka West Khasi Hills District ki la trei shitom ban ïai bteng ban rep ïa u kba, da ka jingthmu ban ïoh kheit bad ïoh lum bha da ka jingseisoh bha u kba ha une u snem hynrei la ong ba mynta u snem kiba bun ki nongrep ki kham ïoh duna ban lum ïa u kba kumba ju long.
Halor kane ka phang haba ïakren bad u samla Lumlang Kharsyiemlieh, General Secretary ka Hills Farmers Union (HFU) ka West Khasi Hills lem bad ki katto katne ki nongrep ki la ïathuh ba mynta u snem ka jingïoh ban lum ïa u kba ka duna bha.
Shuh shuh ki la ïathuh ruh ba ki katto katne ki daw halor ka rukom ïoh lum ïa u kba ki la ong ba mynta u snem ka dei ka snem kaba ki nongrep ki ud bha hapoh West Khasi Hills. Ka daw kaba nyngkong ka dei ka jingbym thikna bha ha ka por ba u kba u donkam slap, ka don ka jingrang, kumjuh ha ka por ba u kba u donkam ïa ka jingrang u slap bha.
Sa kawei ruh ka jingwan lyngshop jong u phria ha ki bynta jong ka West Khasi Hills District ka dei kaei kaei kaba pynduh mynsiem ïa u nongrep bad ruh ka jingwan u slap ha ka por ba ki dang lum ïa u kba na ki pynthor.
Ka Hills Farmers Union West Khasi Hills lyngba u samla Lumlang ka kyntu ïa ka Sorkar ba ha kum kane ka por ba kan ïarap lem ïa ki nongrep namar ki nongrep kiba la shah shoh phria u kba ki la phah ïa ki thup lyngba ki shnong ki thaw kaba katno ki jot katno ki don ki pynthor.
Kumta ka seng ka kyntu ïa ka Sorkar ba kam dei ban pynslem kumba leh ha kine ki snem ba la dep hadien ba ki la buh ka jingkyrpad.
Ka HFU WKH ka la phah ruh ka khubor sha baroh ki nongrep ba kim dei ban duh mynsiem haba ki ïoh lum duna ïa u kba, hynrei ka pynshlur ba ym dei ban duh jingkyrmen hynrei ngeit ba u Blei un kyrkhu ha kine ki snem ki ban wan bad yn pynim ïa kane ka riti ka dustur ba u Blei u la buh ha kane ka Ri Khasi kaba kan ïai bteng ban rep kba.
