Shillong, Naiwieng 28
Ka jingïakren pynbeit hapdeng ki ar tylli ki jylla, Meghalaya bad Assam ka lah ban bteng biang ha u snem thymmai syndon namar ka jingbym pat lah ban pyndep ïa ki kam mynta u snem.
Ki Regional Committee ki dei ban pyndep ïa ki katto katne ki kam kum ka jingleit jurip ïa ki jaka nalor ka jingsngap ïa ka sur jong ki nongshong shnong kiba kwah ban don sha kano ka jylla.
Ka tyllong khubor ka ïathuh ba na ka liang ka Assam ruh ki Regional Committee kim pat lah ban pyndep ïa ki kam kiba la bynshet kynthup ka jingïakynduh bad ki Regional Committee na Meghalaya.
Kine ki Regional Committee ki ïoh por ha u Nohprah 2024 ban pyndep ïa ki kam bad ki hap ban phah kaiphod sha la ki jong ki Sorkar Jylla.
Ha Meghalaya, kawei ka Regional Committee ka dei kaba long Chairman da u Symbud Myntri Rangbah u Bah Sniawbhalang Dhar bad kawei pat ka dei kaba long Chairman da u Bah Prestone Tynsong bad kawei pat ka dei kaba long Chairman da Myntri Sorkar u Bah Paul Lyngdoh.
Na ka liang u Myntri Rangbah ka Jylla, u Conrad K Sangma u la ong ba jingïakren pynbeit pud bad ka Assam ka la dei ban bteng biang ha kaba la dep ban ai khubor markylliang ban pynbeit ïa ka sngi ban ïakynduh hynrei hapdeng jong kata, ka wan noh sa ka ilekshon MLA shiteng samoi ha Assam bad Meghalaya. Nalor ki ilekshon shiteng samoi, ka don ruh sa ka ilekshon MLA ha Jharkhand bad Maharashtra kiba la nang pynslem ïa ka por.
U Myntri Rangbah u la ong ba um lah ban batai ïa ka por ïa mynta lano kan don ka jingïakynduh jong ki Myntri Rangbah na baroh ar tylli ki jylla tad haduh ba un da ïoh ban pynbeit bad u Myntri Rangbah ka Assam.
U la ong ruh ba ka don sa ka jingthaw Sorkar ha Maharashtra bad kine kiei-kiei ki long ki daw kiba pynslem ha kaba ïadei bad kane ka bynta.
“Ngi kyrmen ba shen ngin sa lah ban bteng biang ïa ka jingïakren tangba ym lah ban ong lypa ïa ka por tad haduh ban da ïoh ban ai ktien biang bad u Myntri Rangbah ka Assam.
Ha kawei pat ka liang, ka Meghalaya bad ka Assam ki hap ban pyndep noh kloi ïa ka jingbuh dak ïa u pud u sam bad sieh ïa ki païa mawpud ha ki hynriew tylli ki jaka kiba la dep mynjur ban pynbeit ïa u pud u sam kum ha Hahim, Khanapara-Pillangkata bad kiwei kiwei.
Ka jingpynbit jingpynbiang ban buh dak ïa u pud u sam la leh lyngba ka Survey of India ha ryngkat ki ophisar na baroh ar tylli ki Jylla.
Dang shen, u Chief Secretary ka Jylla, u Bah DP Wahlang, u la ïathuh ba la donkam ban pyndep noh ïa ka jingpeit bniah bad buh dak ïa u pud u sam ha Tarabari bad ka don kawei ka shnong kaba dei ban don ha Meghalaya kaba dang hap ban ïakren pynbeit bad ki bor kiba kham shalor.
Ha kiba bun ki jaka la pyndep ïa ki kam kiba donkam, bad ynda la dep na Tarabari, ka kynhun jurip bniah kan leit ruh sha Hahim ban pyndep ïa ki kam kiba dang sah.
Haba ïadei bad ki jaka ha Khanapara, u Chief Secretary u la ong ba ki kam hangne ki kham shem jingeh bad kham shim por namar hap ban peit ïa ki jaka puta jong ki riewshimet namar ki don kiba kwah ban don ha Meghalaya bad ki don ruh kiba kwah ban don ha Assam.
Ki hynriew tylli ki jaka ïakajia pud kiba la mynjur ban pynbeit noh ki long ka Tarabari, Gizang, Hahim, Baklapara, Khanapara-Pillangkata, bad Ratacherra.
Na ka liang Union Home Secretary u la pynpaw ka jinghun ba ki Sorkar Jylla na baroh arliang ki la pynpoi sha ka bynta ban pyndep ban buh dak ïa u pud u sam ha Hahim ha kaba la bthah ruh ban pyndep noh sa ban sieh mawpud ha Hahim hapoh u Nohprah mynta u snem.
Ka Ministry of Home Affairs jong ka Sorkar Pdeng ka la ai jingmut ruh ïa ka Assam bad Meghalaya ban nang jam shakhmat ban pynduna ka jingïakajia ha ki hynriew tylli ki jaka kiba dang sahteng ban pynbeit pud ha kaba la bynshet ha ki regional committee ban nang pynïaid ïa ki kam na baroh arliang.
Ki Regional Committee ki la ïoh por ban phah noh ïa ki kaiphod haduh ka 31 tarik Nohprah, 2024.
