Shillong, Naiwieng 28
Uwei u rangbah u la mynsaw jur hadien ba u la shah shoh shah tied ha ki runar ki bym lah satia ban ithuh, hadien ba ki la dep ban lute ïa ka pisa da ki lak tyngka na u.
Katkum ka khubor na ki pulit la ong ba kawei ka longkmie ka la ujor sha ki pulit ba ha ka 26 tarik mynta u bnai, ha ka por 4.30 mynstep, ki runar kiba la tap durkhmat bha ïalade kiba don kumba 5 ne 6 ngut, kiba la wan da kawei ka kali Maruti, ki la khang lynti ïa ka kali kaba don ïa u registration number ML04-D-0365 ba la ñiah da u kurim jong ka u Bah Poibha Suiam ba la 27 snem ka rta ha kawei na ki jaka.
La ong ba hadien kane, kine ki runar ki la shoh la dat ïa u, ki la lute ruh ïa ka pisa kaba u la rah kaba la kot sha ka T.2.9 lak, kaba la jia ha ka shnong Mynsngat ha West Jaiñtia Hills.
Shuh shuh la ong ba ha kane ka jingjia, u Bah Poibha Suiam u la mynsaw bad la pynkit noh sha PHC kaba don ha Nartiang hynrei namar ba la kham jur ka jingmynsaw, la pynkynriah noh nangne sha Woodland Hospital ha Sabah Muswang.
Ha kaba ïadei bad kane ka jingjia, na ka liang jong ki pulit hadien ba ki la ïoh ka jingujor, mynta ki dang pynlong ïa ka jingtohkit ban lap ïa ki jingshisha bad kumjuh ban thwet ïa ki briew kiba donkti ha katei ka kam.
