Mawkyrwat, Naiwieng 28
U Myntri ba khmih ïa ka tnat sam umbam umdih ka Jylla (PHE) u Marcuise N Marak u la hiar ban jurip ïa ki jingpyntreikam ïa ka Swacch Bharat Mission (G) bad Jal Jeevan Mission hapoh ki lai tylli ki district, ka West Khasi Hills, South West Khasi Hills, bad Eastern West Khasi Hills. Ha kane ka jinghiar jurip la pynlong ruh da ka jingïalang khmih bniah hapoh Conference Room Circuit House, Mawkyrwat.
Ïa u Myntri ha kane ka sngi la synran lang da u MLA ka Nongstoiñ Bah Gabriel Wahlang, Principal Secretary ka tnat PHE Syed Md. A Razi, ha ryngkat ka jingïadon lang jong u Deputy Commissioner ka South West Khasi Hills District Bah B Mawlong, Mission Director Kong Aldealyne Nikhla, Chief Engineer PHE, Kong BM Lyndem bad Add SP Bah D Mawlein. Ki ophisar rangbah jong ka tnat PHE na kitei ki district bad kiwei ki ophisar ki la ïashim bynta lang ha katei ka jingïalang khmih bniah.
Ha shwa katei ka jingïalang, u Myntri ula pynlong ïa ka jingleit jurip ïa ka Greater Mawkyrwat Water Supply Scheme, Nonglang Water Supply Scheme bad Wahsala Scheme.
Ha kane ka jingïalang, la ïoh ban ïa phylliew jingmut bad ïakren sani bha ïa ki jingpyntreikam ïa ki skhim bapher bapher, kum ki skhim kiba la lah ban pyndep, ki skhim kiba dang pyntreikam bad kiwei kiwei ki projek ne skhim ki ban sa pyndep ha ka por kaba biang. Kane ka jingïalang bad jingwan jurip ka long kum shi bynta jong ka jingthmu bad jingaiti ka Sorkar Meghalaya ban pynthikna ba ki jingpyntreikam ïa kitei ki skhim lyngba ka Swacch Bharat Mission bad Jal Jeevan Mission kin long kiba seisoh ha kitei ki thaiñ.
