Shillong, Naiwieng 28
Ka jingjur jong ki kam tuh kam shah thiem hapoh ka nongbah Shillong ka la long kaba shyrkhei haduh katta-katta ha kine ki sngi kiba mynta. Kine ki runar kiba la leh ïa kum kine ki jait kam kim don shuh wat ïa ka mynsiem lehraiñ ruh wat ban tuh napoh ki jaka mane blei lane ki ïingmane.
Kane ka jingjia shah tuh-shah thiem jong ki ïingmane ka la jia ha ki katto-katne tylli ki ïingmane kiba don hapoh ka nongbah Shillong kiba kynthup naduh ka ïingmane jong ka Grotto Chapel kaba la shah tuh ha ka step jong ka 26 tarik u Naiwieng 2024 ha ka por kumba 2:35 mynstep. Katkum ki kor ring dur la ïohi ba ki la don 2 ngut ki nongtuh kiba la prong tuh shapoh katei ka ïingmane bad pynpait ïa ar tylli ki duli buh tiar bad ki la ïoh ban rong noh ïa kawei ka laptop bad ka pisa T.15 hajar na ar tylli ki synduk kiba ju buh ïa ka pisa bai kynshew. Halor kane ka jingjia na ka liang ki bor pynïaid ka ïingmane ki la leit buh noh da ka ejahar.
Ha kawei pat ka jingjia shah tuh kaba la jia ha ka ïingmane jong ka Balang Unitarian kaba don ha Madan Laban ha ka step phyrngab jong ka 28 tarik u Naiwieng 2024, ha kaba katei ka ïingmane ka la shah prong tuh bad shah rong 4 tylli ki khiew syntiew kiba remdor bad 2 tylli ki khuri kiba dei ki rnong bad kiba la ju pyndonkam ha ka por lehñiam.
Haba ïoh ban ïakren bad u Rangbah Shnong jong ka Madan Laban, u Bah Iostar Sunn u la ong ba ka shnong ka la ïoh jingtip halor kane ka khubor ha ka por 6.30 ne 7 baje eiei mynstep bad ong ba ha ka jingkhmih ïa ka rung ka mih jong kitei ki nongtuh, la suba jur ba ki la ïoh ban rung nadien ka phyllaw jong katei ka ïingmane.
U Bah Sunn u la ong ba kaba sngewsih ka long ba kine ki nongtuh ha kine ki sngi kiba mynta kim don shuh wat ïa ka mynsiem sngewlem ruh wat ban tuh napoh kane ka jaka kaba kyntang bad kaba mane blei bad ong ba kum kine ki jingjia kim ju kham jia koit hapoh ka shnong-ka thaw.
“Kane ka jingtuh-jingthiem mynta ka la long kaba ishyrkhei bad ngim lah ban sngewthuh shuh na kaei ka daw kaba la pynlong ïa ki ba kin long ha kane ka rukom namar ba ka shnong jong ngi ka long kaba ym ju kham bna ban don ïa ki jingshah tuh hapoh ki ïingmane”, ong u Bah Sunn.
U Bah Sunn u la ïathuh ba halor kane ka jingjia, la dep ban ujor sha ki bor pulit ka thanat Laban bad na ka liang ki bor pulit ki la wan ban tohkit mar-mar halor kane ka jingjia bad ba ka jingthwet ïa ki briew kiba donkti halor kane ka jingjia ka dang ïaid shakhmat.
Na ka liang u Bah Pliebok Mylliemngap, Secretary jong ka Balang Unitarian u la ong ba ka jingïai shah tuh jong ki ïingmane ha kine ki sngi kiba mynta ka dei lehse na ka jingjyllei eh ka jingdih ïa u drok namar kine ki briew kiba la ngop ha une u jait jingdih kim salia shuh wat ban thom ïa ka sang-ka ma ne ban tuh na ki ïingmane ba kyntang tang ban ïoh thied drok bad pynhun ïalade shimet.
“Ngi ïohi mynta ba ka don ka jingpyrshang kaba jur bha ban tuh na ki ïingmane bad ngim lah ban mutdur ba kin wan tuh na ki ïingmane bad kane ka jingjyllei jong u drok da ka jingngop jong ki khun samla, imat ka dei kaei-kaei kaba kim salia shuh ban thom ïa ka sang-ka ma bad wat ban thom ïa ka ïingmane ruh. Ngi kheiñ ïa ka ïingmane ba ka dei ka jaka kaba kyntang bad ba ngim nud ban leh ïa kino-kino ki kam thala hynrei kine pat ha ka jingkwah palat ban ïoh ïa u drok katkum ka jingdawa jong ki, kim salia shuh ban tuh”, ong u Bah Mylliemngap.
Na ka liang u Bah LMB Rani, Chairman jong ka Balang Unitarian u la ong ba kitei ki tiar kiba la shah tuh napoh katei ka ïingmane ki dei ki tiar kiba la rim bha kiba la don naduh ki por hyndai-hynthai bad ki long kiba shongdor haduh katta-katta.
