Shillong, Naiwieng 28
Ki pulit ryngkat bad u Myntri jong ka shnong Kyrdoh kaba hap ha East Khasi Hills ki la ïoh ban bat noh ïa ki lai ngut suba nong Bangladesh.
Katkum ka khubor kaba la ïoh lum na ki pulit la ong ba ha ka 26 tarik mynta u bnai ha ka por 4.30 mynstep, hadien ka jingïoh jingtip ki pulit ryngkat bad u Bah Bashan Lyngdoh, uba dei u Myntri ka shnong Kyrdoh, ki la ïoh bat ïa lai ngut ki suba nong Bangladesh ba la tip kyrteng kum u Umar Farook (18 snem), u Md. Sajid (18 snem) bad u Md. Iman Ali (30 snem).
Ïa kine ki briew la ïoh ban bat katba ki dang don ha kawei ka bos ha jingkieng Kyrdoh bad la lap ba kim don satia ïa ki kot ki sla kiba biang ban pynshisha.
