Shillong, Naiwieng 28
Ki samla pule doktor hapoh ka North Eastern Institute of Ayurveda & Homoeopathy (NEIAH) Medical College, Maw-diangdiang Shillong kiba dang pule ha ka kyrdan Post-Graduate ki la dang ïai bteng ban pynlong ïa ka jingshong shah thngan kaba khlem buh por bad kaba ka ïaid mynta kumba 48 kynta tam ha ka 26 tarik u Naiwieng 2024.
Kane ka jingïakhih ka long ban pynpaw ïa ka jingpyrshah jur halor ka jingleh bym suitñiew ki bor ba halor kiba la pynsahteng ban siew ïa ka bainong ne ka ‘stipend’ na ka bynta shisnem ba la dep kaba la neh la kumba 10 bnai kynthih bad kaba la pynlong ruh ïa kiba bun ki samla pule ba kin shem shitom shi kat dei eh ha ka liang ban pynbit-pynbiang ïa ki jingdonkam kiba man la ka sngi.
Nalor kane ka jingbym siew ïa ka bainong jong ki samla pule, kiwei-kiwei ki mat jingdawa jong ki, ki kynthup ïa ka jingbym pynïasoh ïa ki jingpule MD (Homoepathy) kaba 3 snem jong ka PG bad ka North-Eastern Hill University (NEHU) bad kawei pat ka mat jingdawa ka dei halor ka jingbym lah ban ai ïa ka jingpynïaid kaba la bthah da ka National Commission for Homoeopathy.
Kum ban shu kdew hangne, kitei ki samla pule doktor ki la sdang ïa ka jingshong shah thngan naduh ka por 9 baje step jong ka 26 tarik u Naiwieng 2024, hadien ka jingbym ïoh jong ki ïa ka ‘stipened’ naduh ka 23 tarik u Nohprah 2023. Dei tad haduh ka 10 tarik u Nailur 2024 pat ba kitei ki samla pule doktor ki la mih noh shakhmat ban pynlong da ka jingïakhih ha phyllaw jong katei jaka pule da kaba shong kyllaiñ mongor ha ryngkat ki jingthoh ha ki ‘placard’ na ka bynta ban dawa ban pynurlong ïa ka bhah bad ka bainong kaba ki dei ban ïoh lyngba ka ‘stipened’.
Wat lada na ka liang ki bor pynïaid jong katei ka jaka pule ki la phah pynsangeh noh ïa katei ka jingïakhih ha katei ka por bad ong ban ai por kumba ar bnai eiei ïa ka jaka pule khnang ba kan lah ban pynurlong ïa ki jingdawa jong ki samla pule. Hynrei wat hadien kane ka jingphah pynsangeh ïa ka jingïakhih jong ki samla pule ruh, katei ka jaka pule ka khlem shimkhia satia wat hadien ka jingdap ar bnai tam ban leh eiei halor kane ka bynta.
Kane ka jingïakhih jong ki samla pule doktor Post-Graduate (PG) jong katei ka skulbah kiba don 8 ngut, ka la sdang paw paidbah bad khluit tar ha ka 27 tarik u Naiwieng 2024, hadien ba ki samla pule jong katei kajuh hi ka skulbah kiba dang pule ha ka kyrdan Under-Graduate (UG), ki la ai ïa ka jingkyrshan jong ki na ka bynta kitei 8 ngut ki samla kum ka dak ban dang ïai pynkhlaiñ shuh-shuh ïa ka jingïakhih bad ba ka jingdawa jong kitei ki samla pule kan long kaba seisoh.
Kitei 8 ngut ki samla pule kiba la pynlong ïa ka jingshong shah thngan ki la pynpaw ba kin dang ïai bteng ïa ka jingïakhih tad haduh ba ka bor synshar kan ai da ka jingthoh ba kin pyllait noh ïa ka bainong jong ki kaba shisnem bad kin shimkhia ruh mardor ban ïoh ïa ka jingïasoh bad ka NEHU.
Haba ïoh ban ïakren bad uwei u samla pule jong katei ka jaka pule u la ong, “Ki jingdawa jong ngi ki long kiba shai bha bad kata ka long ba kum ki samla pule ki khlem shym la ïoh ïa ka ‘stipend’ wat tang shibnai ruh naduh ba ki la pule ha ka MD Homeopathy, wat haba la kular ban ai jingkyrshan pisa ïa ki.”
“Nalor kata, ngi lap ba ka kolej kam pat ïadei bad kano-kano ka skulbah, watla la pynthikna ïa ngi ha ka por ba la pdiang ïa ngi ba ka jingïadei bad ka NEHU kan sa long shen. La pynthikna ïa ngi ha ka por ba pdiang ïa ki samla pule ba yn ailad ïa ka jingpynïasoh bad ka NEHU, hynrei kam shym la jia satia,” la bynrap une u samla pule.
Kitei ki samla pule kiba ïakhih ki la pynpaw ruh ïa ka jingsngewkhia halor ka jingbym don ka jingïalam ha ka jingpule ha ka rukom hikai jong ki ha ka Postgraduate (PG) bad ki la dawa na ki bor ba dei peit ban pynbeit mardor ïa ki jingeh jong ki, khnang ban pynthikna ba ka jingkiew ha ka jingpule jong ki kan ym shah khanglad shuh.
“Khlem ka jingïadei, ki degree jong ngi kim don jingmyntoi. Ki Degree jong ngi ki don ha ka jingma. Ngi kwah ba ki bor synshar kin pyndep ïa ki jingkular jong ki bad ban pynthikna ba ngi ïoh ïa ka jingpynõaid kaba biang na ka bynta ki kam pule jong ngi,” ong u samla pule.
Katba ka jingshah thngan ka dang ïai bteng, na ka liang ki bor pynïaid jong ka NEIAH kim pat lah ban ai jubab halor kane ka jingdawa jong ki samla pule, hynrei ki samla pule ki la kren shai ba kin ïai bteng ïa ka jingïakhih tad haduh ban da pynurlong ïa ki jingdawa jong ki.
Ha ka jingdap 48 kynta tam ka jingïakhih jong ki samla pule, la sakhi ruh ba na ka liang ki dkhot ka Khasi Students’ Union (KSU) NEIAH Unit ruh ki la wan ban ai jingkyrshan lem ïa kitei ki samla pule doktor kiba la pynlong ïa ka jingshong shah thngan ha katei ka jaka.
