Ki kam tuh kam thiem ki la long shisha kiba jur ha kine ki sngi, ki taïew bad ki bnai ba la leit, ha kaba na ka por sha ka por la ju sakhi ïa ki kam tuh ha kylleng ki bynta jong ka nongbah Shillong, ki khap sor bad wat ruh sha ki thaiñ nongkyndong hi baroh kawei. Balei ki kam tuh kam thiem ki jur bha? Ka long ka jingkylli kaba mih na man la iwei-pa-iwei. Ka jingjur jong ka tuh ka thiem ka la long haduh katta-katta ha kaba kam don shuh ka jingshngaiñ ha ki nongshong shnong, la ha ki ïing ki sem, ki dukan, ka jingpynïeng ïa ki arshaka, ki kali ne wat ha ka leit ka wan da ka kjat. Kawei na ki daw ka dei namar ka jingkynrei palat jong u drok uba la suhthied haduh katta-katta, haduh ba kiba bun ki samla ki la ngop lut bad shisien ba la mad ïa une u jingdih, la ong ba ka long kaba eh pat ban kiar. Ki don kiba ong to ngin shu ïa mad ban tip u long kumno, hynrei kane ka dei ka lynti kaba lam pat sha ka jingngop bad shah teh kynjri ha une u jingdih bad shisien ba la ngop ka met ka la brai, ha kaba la kwah shi kwah, haduh ba kito kiba la ngop kim don jingsalia ne lehraiñ satia wat ban jrong kti shwa na la ïing la sem tang ban ïoh thied ïa u drok.
Ka kam tuh kaba la kiew biang mynta, kam dei shuh tang na ki ïing ki sem ne ki dukan bad kiwei ki jaka, hynrei wat ki ïingmane ruh kim don jingshngaiñ. Ngi la ïohi dang ha kine ki khyndiat sngi, ka ‘Grotto Chapel’ jong ka Cathedral Parish kaba don ha Laitumkhrah, ka la shah kyndang ha ki runar, ki bym don shuh ïa ka mynsiem ne ka jingïatip lem haduh ban tuh ïa ki tiar bad ka pisa. Nalor kane, ha ka Sngi Palei pat sa ka ïingmane jong ka Balang Unitarian kaba don ha Madan Laban ruh ka la shah kyndang ha ki nongtuh kiba la kit lut ïa ki tiar ki tar. Balei kine ki kam tuh ki kiew biang? Aïu ka tnat pulit ka la leh ban ïada na kum kine ki kam shah tuh. Ngi ïoh ban sakhi ba ha kiba bun ki kam tuh kiba la dep jia, ïa ka dur jong ki nongtuh la ïoh ban kem da ki kor CCTV kiba la pyndait hynrei haduh mynta ym pat ïoh sngew ba kita ki nongtuh kiba la paw dur tyngkreiñ kin shah kem. Kane ka jingbym ïoh kem bad lap dien ïa ki nongtuh, wat lada la ithuh dur lyngba ki kor CCTV, ka long pynban kum ka jingai mynsiem ïa ki nongtuh ban bteng ïa ki kam tuh bad ruh ban ym salia shuh wat la ki tip ba don kine ki kor.
Na kine ki kam shah tuh, ngi lah ruh ban ïohi ba ki nongtuh ha kine ki por ba mynta, kim don jingtieng shuh satia, wat ha ka por mynstep, mynsngi ruh ki leit ban prong tuh beit sha ïing ki briew. Kawei na ki daw pat ka jingkynrei ka kam tuh, la sngewthuh ba dei ruh na ka jingbym khlaiñ jong ka aiñ, namar lada don ba shah kem ruh, tang hadien khyndiat kynta ne katto-katne sngi ki la lait. Ka nongbah Shillong bad kiwei ki shnong marjan kim shngaiñ shuh. Ka tnat pulit ka dei ban shimkhia halor kane bad ban pynjur ïa ki jingïaid pahara ha kylleng ki bynta bad ruh ban thwet tyngeh ïa kito kiba la ithuh dur, namar la sngewthuh ba kin ym lah hi ban phet shabar ka jylla. Kumta donkam ban pynïajan ka jingïatrei bad ki Dorbar Shnong ryngkat ki nongshong shnong khnang ban ïoh kem ïa kine ki nongtuh bad ruh ban lah khanglad ïa ka tuh ka thiem.
Ban khanglad ïa ki kam tuh, dei ban leh tyngeh ruh ïa kito ki briew kiba donkti pat ban thied ïa ki mar tuh. Kane ka pynbang bad pynshlur ïa ki ban kamai pisa suk da kaba knieh noh ïa ka umsyep jong kiwei, kiba la kynshew shitom. Kumta ka jingpynsaja ka dei ban long kham tyngeh ïa kiba thied ïa kine ki mar tuh ban ïa ki nongtuh.
