Shillong, Naiwieng 28
Ka tnad pule-puthi ka Sorkar Jylla ha ka Sngi Palei ka la soi ïa ka soskular ka jingïateh bad ka National Stock Exchange of India Limited (NSEIL) ha ka jingïadon lang u Myntri Rangbah ka Jylla, u Conrad K. Sangma, Myntri ka tnad pule-puthi, u Rakkam A. Sangma, u Chief Secretary ka Jylla, Bah D.P. Wahlang, Commissioner & Secretary, u Vijay Kumar Mantri lem bad kiwei-kiwei ki ophisar ka tnad pule-puthi.
Ka jingthmu jong kane ka sienjam ka long ban ai jinghikai halor ka pisa-tyngka, ka jingpynsngewthuh ïa ki nongbei tyngka ha ka ïew jong ki mar ki mata bad kiwei-kiwei ki prokram ai jinghikai ha kylleng ka Jylla.
Kane ka long ruh kum shi bynta ban pynmih ïa ki lad ai kam ai jam na bynta ki samla ha ki thaiñ nongkyndong bad sor ha ka liang ka ‘Banking, Financial Services and Insurance Sector’ (BFSI) ka ban pynkup bor bad pynbiang ka rynsan ban kyntiew ïa ka sap ka phong ki samla ka Jylla.
Ka prokram ka thmu ban pynrung ïa kum kane ka jingtip ba kongsan sha ki nongïoh myntoi, ka jingsngewthuh bad ka jingtbit ha ka liang ki kam ba ïadei bad ka pisa-tyngka, ki ïew ïadie-ïathied, ki jingïarap pisa, ‘Mutual Fund’ ka tnad ‘Insurance’, bad kiwei-kiwei, da kaba ai jinghikai katkum ba lah, ban pynsuk da ka NSEIL ban pynbiang ka rynsan sha ki nongïoh jingmyntoi bad ban kyntiew ïa ka jinglong-jingman jong ki – ha kajuh ka por ban pynlah ïa ki ban ïoh ïa kum kine ki lad ki kabu na bynta ki jingthmu jong ka jinglah jong ki ban ïoh kam ha ka BFSI.
Shuh shuh baroh ki nongïoh myntoi kiba seisoh kin ïoh pdiang khusnam da ka syrnot ynda ki la pyndep pura ïa ka jinghikai/prokram kumba la thmu da ka NSEIL.
Ïa kane ka MoU la soi da u Director ka tnad Higher and Technical Education uba mihkhmat ïa ka tnad pule-puthi ka Sorkar Jylla bad u Chief Business Development Officer, National Stock Exchange of India Limited.
