Shillong, Naiwieng 28
Kiba thoh khubor, kiba ring durkhih bad shondur ha ka kyrteng jong ki lad pathai kin ïoh myntoi shuh shuh hadien ba ka Sorkar Jylla ka la rai ban pynkiew ïa ka jingïarap lyngba ka Journalist Welfare Scheme.
Ka Sorkar Jylla hapoh ka jingïalam u Myntri Rangbah u Conrad K Sangma bad ka Myntri kaba peit ïa ka Information and Public Relations ka Kong Ampareen Lyngdoh ka la ai jingmynjur ban kyntiew ïa ki jingïarap ïa kiba don ha ka kam pathai khubor.
Kum ban pynkynmaw, u MLA ka BJP na South Shillong u Bah Sanbor Shullai u la kren ha Ïingdorbar Thawaiñ ha kaba ïadei bad ki jingïarap kiba ki nongthoh khubor ki dei hok ban ïoh.
Ka Myntri ba khmih ïa ka tnat pathai jingtip (Information & Public Relations) ka Kong Ampareen Lyngdoh ka la ong ba kane ka skhim kan treikam mynta bad ka sngewkmen ban pyntip sha ki nongthoh khubor ïa ka song jingmyntoi kaba dei ban ïoh lyngba ka Journalist Welfare Scheme ka ban sdang treikam naduh ka 1 tarik u Nohprah 2024.
Haba pyntip ba kane ka dei ka jingpynsngew kaba la slem bha na ki nongthoh khubor ka Jylla, ka Kong Ampareen ka la ong ba ka Journalist Welfare Scheme mynshwa ka dei tang T.1 lak lada khlad ki nongpathai khubor bad ka T. 1 lak ha ka juk mynta ka dei kaba dang duna palat bad la rai ban pynkiew noh sha ka T. 5 lak.
Ka Kong Ampareen ka la pyntip ruh ba lada dei ban shah sumar ki nongpathai khubor ïa ki jingpang kiba jur, kin ïoh ban shim T. 50,000 ha ka skhim barim, hynrei mynta la pynkiew sha ka T.3 lak.
Ka Committee kaba la thung da ka Sorkar Jylla kan sa khmih ban pyntreikam ïa kane ka skhim bad buh ïa ki kyndon kiba dei ban pyntreikam.
Nang pynslem ki ilekshon shiteng samoi ïa ka jingïakren ki ar Jylla
