Shillong, Naiwieng 29
U Symbud Myntri Rangbah ka Jylla ba khmih ïa ka Kam Pohïing (Pulit), Bah Prestone Tynsong u la ïathuh ba u la dep ban bthah ïa u Superintendent of Police ka East Khasi Hills bad kumjuh ïa u SP (City) ban pynthikna ba ka jingshngaiñ kan don ïa ki nongshong shnong bad ban ïada na ki kam tuh kam thiem kiba la kynrei mynta khamtam ha nongbah Shillong.
“Nga la bthah ïa baroh ar ngut ki SP ba kin pynkhlaiñ ïa ki bor pulit ha baroh ki dong bad ki shnong kiba don ha nongbah Shillong”, la ong u Bah Prestone haba kylli ïa ki sienjam ba ka Sorkar ka la shim ban tehlakam ïa kum kine ki jingjia kiba wanrah jingsyier ïa ki nongshong shnong.
U la ong ba kine ki jingjia ki mih namar ka jingbun palat ki briew kiba dih drok ki bym salia shuh ha kano-kano ka por ban leh ïa ki kam tuh kam thiem.
“Ka don ka jingsyier jong ki paidbah wat ha ka por mynsngi mynshai na ka daw ka jingbun palat ki nongdih drok. Khnang ba ki paidbah kin don ha ka jingsngew shngaiñ nga la bthah ban pynkhlaiñ shuh shuh ïa ki bor pulit khamtam ha kane ka por ba la sdang ka aïom lehkmen”, u la ong shuh shuh.
Kane ka jingkren jong u Symbud Myntri Rangbah ka dei ruh hadien ba ki la mih bun ki jingjia shah tuh, naduh ka jingshah prong tuh ki ïing ki sem bad wat haduh ki ïingmane ïa kaba la suba ba ïa kine ki kam runar la leh da kito kiba la kyrni ha u drok ki bym don shuh ka jingsheptieng ne salia.
Haba pyrshang ban ïakren bad ki heh pulit ka East Khasi Hills District ki la kyntait ban ïathuh ei-ei halor kiba bun ki kam tuh kam thiem kiba la jia ha nongbah Shillong ha kine ki khyndiat sngi ba la dep.
Katkum ka jingtip ba la ïoh lum la ïathuh ba ha ka step phyrngab jong ka sngi Thohdieng la ïoh bat noh ïa uwei u briew uba dang thmu tuh na Seventh Day Adventist Church ha Fire Brigade ïa uba la aiti noh sha ki pulit ka thanat Laitumkhrah.
Kawei pat ka jingjia kaba ym lah satia ban ngeit ka la jia ha ka step sngi Palei ha kaba ki runar ki la prong ïa ka ïingmane Unitarian kaba don ha Madan Laban, Shillong bad ïoh ban rong tuh ar tylli ki khuri rnong ba pynïeng mombati ha ka por lehniam, saw tylli ki khiew syntiew ba la rim bha. Nalor kata ki runar ki la rong tuh ruh ïa kawei ka khuri na ka ïingmane barim kaba don mar syndah bad ka ïingmane ba thymmai.
Kawei pat ka jingjia ka dei ka jingleit prong ki runar ïa ka Grotto Chapel kaba don hapoh jong ka ïingmane Cathedral Parish, Laitumkhrah ha ka sngi Ba-ar mynta ka taïew ha kaba ki la ïoh rong ïa kawei ka laptop bad ka pisa jingkynshew ainguh kaba kot T.15,000.
Dang shen ki runar ki la prong tuh haduh arsien ha ka jaka ba don pyrshah ka shlem treikam jong ka tnat Printing and Stationary kaba don ha u Lum Secretariat, Shillong. Ka jingjia shah tuh kaba nyngkong ka la jia ha ka miet 13 tarik mynta u Naiwieng 2024, ha kaba ki nongtuh ki la prong jubor ha ka jaka ba buh ïa ki Generator, ha kaba ki la rong ïa ki Wire Light kiba dei ki tama. Ha ka sien kaba ar na kane ka juh ka jaka ka la jia ha ka step synïa jong ka 19 tarik mynta hi u Naiwieng ha kaba ki runar ki la rah syndon ïa ki Battery saw tylli da kaba pynpait ïa ki tala ba khang ïa ki Generator.
Nalor kine ka nongbah Shillong ka la sakhi ruh ïa ki kam tuh kam thiem jong ki runar kiba la nud ban pynpait ïa ki ïit jong bun tylli ki kali bad rong ïa ki tiar ki tar kiba don hapoh, nalor ka jingshah tuh ki ar shaka kiba pynïeng ha ki surok bad wat na phyllaw ïing.
Ka jingjyllei jong ki kam tuh ha sor Shillong ka la wanrah ka jingbym sngewshngaiñ shuh ïa ki paidbah ha ka leit ka wan, wat ha ki kali ba ki shong namar ka jingbym riej shuh ki ‘riew sniew la ka dei ha ka por ba dang shai ne ha ka miet ka ïong.
