Shillong, Naiwieng 29
Bunsien ynda ki khun ki la ngop ha ki jait jingdih pynbuaid khamtam u drok, ki kmie-ki kpa ki ju ïaleh ban pynkylla ïa ki khun da kaba leit ban buh ha ki jaka ai jingsumar lane ‘Rehab Centre’ da ka jingshaniah ba ynda ki khun ki la mih na kitei ki jaka ai jingsumar, kin lait noh na u drok ha ryngkat ka jingïohpdiang ïa ki jingsneng-jingkraw bad ka met-ka phad kaba shait-khlaiñ.
Hynrei ha kane kawei ka jingjia kaba la paw pyrthei ha kine ki khyndiat sngi lyngba ki lad pathai khubor ha kaba ka la mih ka sur jingkynnoh na ki khynnah samla kiba la leit ban sumar ha ki ‘Rehab Centre’ kiba don ha Assam kiba kynthup ha ka Alive Again Foundation, ka Better Living Wellness Founda-tion bad ka Ajoy Foundation ïa kiba la long trai da u Bah Arup Passah. Ka long ka jingjia kaba sngew shyrkhei bha namar ba ha kine ki ‘Rehab Centre’ kitei ki samla ki shah lehbeiñ haduh katta-katta ha ryngkat ka shah bom-shah tied tad haduh u pud ba ki don napdeng jong ki, ki bym lah shuh wat tang ban ïaid-ban ïeng ruh.
Ha ka jingïoh ban ïakren bad katto-katne ki samla kiba la shah sumar ha kitei ki ‘Rehab Centre’ bad kiba la wan ban mih ha ka Sngi Thohdieng jong ka 29 tarik u Naiwieng 2024 sha ka Meghalaya Human Rights Commission (MHRC) ban ujor pyrshah ïa u trai jong kitei ki Rehab, ki la pynpaw ba ka jingshah lehbeiñ jong ki hapoh kitei ki jaka sumar ka la long kaba shyrkhei bha ha kaba ki ju shah bom-shah tied la kum ki mrad.
“Ki la bom ïa ngi kum ki blang-ki masi bad lada dei naei-naei ruh kim tip hynrei ki bom beit naphang. Ngi la panmab ruh hynrei ki bom beit kum ki ksew ïa ngi”, ïathuh kitei ki samla.
Kitei ki samla ki la ïathuh ba kitei ki briew kiba ju khmih ïa ki ha katei ka ‘Rehab Centre’ ki ju phah thok bad byrngem-byrsit lada ki wan kino-kino ki briew nabar ha katei ka ‘Rehab Centre’, ki dei ban thok bad kim dei satia ban ïathuh hok ïa kaei kaba ki ju shah leh hapoh katei ka ‘Rehab Centre’, lym kumta kin ngat ha ka jingshah pynshitom kaba jur bha.
“Ki ju shoh beit ïa ngi bad lada ngi ïakren rit sur ruh, ngi ju shah shoh bad lada ki wan ki briew ne ki bahaïing jong ngi ruh ban peit ïa ngi, ki lah phah sngap jar bad lada ngi kren tang shi kyntien ruh, ngi lah shah shoh beit bad ki la byrngem lypa ba lada ngi bakla tang shi kyntien ruh, ngin shah shoh beit kaba la pynlong ïa ngi ba ngin tieng- ngin smiej ba ngin kren eiei,” ong kitei ki samla.
Shuh-shuh kitei ki samla ki la ïathuh ruh ba ym tang ba ki lah shah pynshitom ha ki nongkhmih-nongpeit jong katei ka jaka ai jingsumar hynrei wat ha ka liang ka bam-ka dih ruh, kitei ki khynnah ki la shah pynjynjar wat ban ïoh ïa ka bam-ka dih ha ka por ba ki thngan bad kwah ban bam.
Kitei ki samla ki la ïathuh ruh ba wat ki jingïasyllok ruh kim ju ïohpdiang satia ha katei ka jaka ai jingsumar naduh ba ki la leit ban shah sumar hynrei ki la shu ïasyllok tang para khynnah suda bad ïathuh ruh ba ki briew kiba ju donkti ban bom bad tied ïa ki kim dei satia ki Khasi.
