Nongstoiñ, Naiwieng 29
Ha ka step 29 tarik u Naiwieng, 2024, kawei ka ïing ka la shah bam duh noh ha ki thylliej ding kaba pynlong ïa baroh ki jingdon-jingem ban julor bad ingkhong lut khait.
U Sordar ka Shnong Wahlyngdoh, West Khasi Hills District, u Bah Kiborlin Kharbani haba pyntip ïa kane ha u nongthoh khubor, u la ïathuh ba katei ka jingjia ka la jia ha ka por 11.00 baje mynstep bad katei ka ïing ka dei jong ka Kong Santamery Ryntong bad u Bah Hanson Nongsiang.
Shuh shuh u la ïathuh ba ïa ka daw ka jingpluh jong katei ka ïing ym shym la lah ban tip namar ha katei ka ïing ym shym la don briew shuh ha katei ka por namar ba ki la leit sha lyngkha.
U Sordar ka Wahlyngdoh u la ong ruh ba katkum ka jingpeit ka jingjulor na ka jingduh noh ïa katei ka ïing, ka la kot sha ki lak tyngka bad u la ong ruh ba na ka liang ka shnong hadien katei ka jingjia ki la pyntip ruh sha ka shlem treikam Nongstoiñ Block kumjuh sha ki pulit.
