Shillong, Naiwieng 29
Ka North-Eastern Hill University Teachers’ Association (NEHUTA) ka la kyntait ïa ki jingkynnoh jong u Vice-Chancellor (VC) ka NEHU, Prof. Prabha Shankar Shukla ba u Prof. Lakhon Kma bad u Prof. Prasanjit Biswas ki dei ki nongsuhbuit (ba shisha) sha lyndet jong ki jingeh kiba mynta ha ka skulbah.
“Ka jingkdew kyrteng jong u ïa ki nonghikai da ki khana lamler bad ki jingkynnoh ba ki la thaw ïa kane ka jingïakhih ka long kaba bakla bad ka bym dei naba dei ma u, uba la pynïaid bakla ïa ka jinglong-jingman ha ryngkat ki jingkyntait bad jingsngew sarong jong u haba ïadei bad ki jingdawa bad kumjuh ha baroh ki kam kiba ïadei bad ka jingïatreilang bad ki nonghikai, ha kaba u la kynran dien bad mynta u la sdang ban kynnoh kylla ïa ki nonghikai na bynta u lum bah ki jingbym larkam baroh,” ong ki nongïalam ka NEHUTA ha ka shithi sha u Principal Secretary, Higher Education, ka Sorkar India.
Katkum ka jingong ka seng, u Prof. Shukla um shym la lah ban khmih bniah ïa ka jinglong khraw jong ka jinglong-jingman kaba la pynlong ïa ki samla pule ban ïaid shakhmat bad ka jingïakhih shah thngan bad ha kane ka jingïaid lynti, uba bun balang jong ka NEHU baroh kawei u la duh jingshaniah ha ka jinglah jong u ban bteng kum u VC ka skulbah. Katkum ka jingong ka NEHUTA, u VC u la sngewthuh bad pynïaid bakla ïa ka jingeh baroh kawei naba u la shah pynïakhlad na ki kam jong ka NEHU – ha ka jingmut-jingpyrkhat bad ha ka met kumjuh.
Ka seng ka la pynpaw ba ka samoi treikam jong u haduh mynta lah ban ñiew kum ka jingkhleh lang jong ki jinglamler ba long bih bad ka jingshisha kaba shiteng. Ka NEHUTA ka la pynpaw ba u VC u la kynthih ha shuwa da kaba pynpaw ïa ka mon sngewbha jong u ban wanphai biang hapdeng ka jingïaid jong ka jingtohkit haba ka komiti ba la thung da ka tnad Sorkar Pdeng ka shah bat ha ki mat jong ka NEHU bad kan sa aiti ïa ka kaiphod jong ka.
“Katba baroh ngi dang ap khmih lynti ïa ka kaiphod, ka jingpynbna jong u ba u kwah ban pynïasoh biang sha NEHU ha ka 02/12/2024 katba ka jingleh jong u kum u VC ka dang don hapdeng ka jingtohkit da ka komiti tohkit ka pyni ba u Prof. Shukla u rkhie arsap ïa ka tnad ka Sorkar Pdeng bad lehse, u pyrkhat ba u don halor jong ka,” la pynpaw ka NEHUTA.
Ka seng ka la bynrap ruh ba u Prof. Shukla uba ju mlien ban thok, u la pyrshang ban ïalam bakla ïa baroh da kaba kam lamler ba ïa ka ‘Inquiry Report’ jong ka NEHU la pynkhreh hapoh jong u Prof. Lakhon Kma kum u Chairman ban pynsniew dur ïa ka nam jong ka NEHUTA bad ki dkhot jong ka kumjuh ïa u Acting-VC, Prof. N. Saha.
Ka NEHUTA ka la pynpaw ba kane ka jingpynkhih win bad ka jingbym don jingkitkhlieh jong u Prof. Shukla ka paw shuh-shuh ha ka jingkren beiñ jong u ba ki nonghikai bym dei ki ‘riewlum ki shah byrngem ha ka por ba pynlong jingïakhih. Kum kane ka jingkren ka long ban wanrah ka jingïapher ha ka skulbah hapdeng ki nonghikai ‘riewlum bad ki bym dei ‘riewlum da ka jingthmu sngew jaidbynriew kaba pyni biang kumno u VC u la thut pura ha ka jingmut jingpyrkhat, kynnoh ka seng.
Katkum ka jingong jong ka NEHUTA, ka kam jong u President ne Vice-President ne kino-kino ki nongkitkam jong ka seng kam dei ban ïajan bad u VC hynrei ka bynta jong ka, ka long ban ïada ïa ka bha ka miat jong ki nonghikai bad jong ka skulbah bad ban khmih bniah ïa ka jingtreikam jong u khnang ba ki kyndon synshar paidbah kin ym shah pynkheiñ.
“Ka NEHUTA kan ym kynran dien ban ïeng hakhmat u Prof. Shukla ne kino-kino kiwei pat ki VC ha kano-kano ka por haba ka NEHU Act, Statute, Ordinance, Regulations and Rules, UGC Regulation 2018, UGC Model CRR, bad kiwei-kiwei ki shah pynkheiñ ne don hapdeng ka jingma,” ong ka seng.
Ha kajuh ka por, ka NEHUTA ka la kob ïa u Prof. Shukla na ka bynta ka jingïatai halor baroh ki jingkynnoh kiba u la pynpaw ban pynsniewdur ïa ka seng ki nonghikai. Ka NEHUTA ka pynpaw biang ba u Prof. Shukla u kren ïa ki jingkren kyllaiñ kiba dap da ki jinglamler bad ki jingshisha ba shiteng ha baroh ki jubab jong u ha ryngkat ki jingkynnoh bym don nongrim ïa ki nonghikai shimet-shimet da ka jingthmu kaba pynjah burom ban pynshitom beiñ namar baroh ha ka imlang-sahlang ki la kyntait ïa ka jingbym larkam bad jingleh baheh jong u.
“Naba ym don lad shuh ban ïada ïalade, u thaw ïa kum kine ki jingkynnoh ki bym don nongrim ban ïada ïa la ki jong ki jingleh bym lah ban ïada – baroh kiba la buh jingthoh bad lum thup da ki nongshim bynta bapher-bapher,” la bynrap biang ka NEHUTA.
Ka seng ka la pynpaw ruh ba la thung ïa u Prof. Shukla kum u VC da kaba buh sharud ïa ki kyrtong kiba kham tbit.
Shuh shuh da kaba kynnoh ba u dei uba la shah thung pura lyngba ka saiñ pyrthei, ka NEHUTA ka la pynpaw ba ka long kaba donkam ban bishar bniah hakhmat ki paidbah kiei ki jingnoh synñiang jong u ha ka pule-puthi bad ka jingwad bniah, ki kot bad kiwei-kiwei ki kam kiba kum kine kiba ïadei bad ka jingwad bniah kiba long kiba donkam ban buh jingkynmaw.
