Nongpoh, Naiwieng 29
Katba ka jingpynkhreh na ka bynta ka ilekshon jied nongmihkhmat sha ka Ïing Dorbar Thawaiñ ka Khasi Hills Autonomous District Council (KHADC) ka la nang jan, ka United Democratic Party (UDP) hapoh Umroi konstitwensi ka la nang ïoh bor bad ïoh mynsiem ha kaba mynta ka sngi, ki nongïalam ba hakhmat jong ka seng ki la pdiang sngewbha ïa ki nongïalam ba la mih noh na ka seng National People’s Party (NPP),Trinamool Congress (TMC) bad Congress ha ka jingïalang kaba la pynlong ha Madan Nongrah.
Ha kane ka jingïalang pdiang sngewbha ïa kitei ki nongïalam barim jong ki seng saiñ hima-sima sha ka UDP, la wan ban ïadon ryngkat naduh u General Secretary ka Sengkmie, u Bah Jemino Mawthoh, MLA ka Nongpoh, Bah Mayralborn Syiem, MLA ka Mawkyrwat, Bah Renikton Lyngdoh Tongkhar, MDC ka Nongpoh, Bah Balajied Rani, CEM barim ka KHADC, Bah Titoswell Chyne nalor kiwei-kiwei de ki nongïalam ka seng.
Wat la na ka liang ka seng lyngba ka State Election Committee kam pat shym la shong pyrkhat ban ai tiket ïano, hynrei ki nongïalam ka seng ha kane ka sngi ki la ïoh ruh ban pynithuh paidbah ïa ka samla Naphishisha Marweiñ, ka samla kaba dang 26 snem ka rta na ka shnong Khweng kaba la don jingthmu ban ïakhun ïa ka ilekshon MDC na ka tiket jong ka seng, lyngba ka jingkyrshan radbah jong ki Jylli bad Shnat bapher-bapher hapoh konstitwensi kiba mynjur ruh ban phah ïa ka kyrteng jong katei ka samla ban ïakhun na Umroi konstitwensi.
Haba ai jingkren ha kane ka sngi, na ka liang jong ki nongïalam ka seng ki la pynpaw ïa ka jingsngewkmen ban ïohi ïa ka jingnang khlaiñ bad suhthied jong ka seng hapoh kane ka konstitwensi ha kine ki khyndiat bnai ba la dep bad lyngba ka jingwan pynïasoh jong ki nongïalam na kiwei ki seng saiñ hima-sima bapher-bapher.
Ki la pynpaw ruh ïa ka jingkyrmen ba lyngba ka jingtrei shitom naduh ki nongïalam na ki Shnat bad ki Jylli bapher-bapher, ki paidbah ka Umroi konstitwensi, sa shisien pat kin pynjop donburom ïa ka seng UDP ha kane ka ilekshon MDC ka ban sa wan, kumba kane ka konstitwensi ka dei kaba la pynmih ïa ki nongïalam bakhraw ha ka Jylla kum u Bah E.K. Mawlong (Bam Kwai ha Dwar U Blei).
