Shillong, Naiwieng 29
Ka jingshah tuh na ki ïingmane ha kylleng ka nongbah Shillong ka la nang ïai jia khah-khah katba dang mih ki sngi. Sa kawei pat ka jingjia shah prong tuh jong ka kawei ka ïingmane kaba la jia ha ka Balang jong ka Seventh Day Adventist Church kaba don Laitumkhrah ha ka step phyrngab jong ka 29 tarik u Naiwieng 2024.
Katkum ki tyllong khubor kiba la ïohlum, la ïathuh ba halor katei ka jingjia, na ka liang ka Balang Seventh Day Adventist Church ka la dep ban ujor da ka ejahar ha thanat Laitumkhrah. Katkum ka jingïohlum jingtip na katei ka ejahar ba la buh ha katei thanat, la ïathuh ba katei ka jingjia jong ka jingwan ki nongtuh ka la dei ha ka por 3 baje mynstep.
Shuh-shuh ha katei ka ejahar, la ïathuh ruh ba ki la don 2 ngut ki samla kiba la thmu ban tuh na katei ka ïingmane bad kine baroh 2 ngut ki dei ruh kiba la kyrni bha ha ka dih drok. Kitei 2 ngut ki la ïoh ban rung shapoh ka ïingmane da kaba lied ïa ka jingkhang sha ka liang kamon da kaba pyndonkam da u lyngka barit. Hynrei ha kum katei ka por da ka jingïohsngew bad jingdon jong uwei u rangbah uba dei u nongkhmih bad nongap ïa katei ka ïingmane, ka jingthmu jong kitei ki samla ka la pulom noh bad pynlong ban ïoh bat noh ïa uwei napdeng kitei 2 ngut katba uwei pat u la lait phet noh na katei ka jaka.
La ïathuh ruh ba ïa utei uba la ïoh bat na ka liang ki pulit ki la dep ban shimti noh. Katkum ki tyllong khubor ki la ïathuh ruh ba kitei 2 ngut ki samla ki dei ki juh ki briew kiba ju donkti ha ka ban leit prong tuh ïa kiwei pat ki ïingmane.
Halor kane ka jingjia, na ka liang ka Balang Seventh Day Adventist Church ka la ong ba na ka liang jong ki, ki la aiti beit ïa kane ka jingjia sha ki bor ka aiñ ba kin leh ïa kaba donkam.
Kum ban shu pynkynmaw hangne ba ha kine ki khyndiat sngi kiba dang shu dep, kumba ar tylli ki ïingmane ki la shah prong tuh ha kaba kawei ka dei ka ïingmane jong ka Balang Unitarian kaba don ha Madan Laban kaba la shah prong tuh ha ka step phyrngab jong ka 28 tarik u Naiwieng 2024 bad shah tuh 4 tylli ki khiew syntiew kiba remdor bad 2 tylli ki khuri rnong bad kawei pat ka dei ka ïingmane jong ka Grotto Chapel kaba don ha Laitumkhrah kaba la shah tuh kawei ka laptop bad ka pisa bai kynshew T.15,000.
