Shillong, Naiwieng 29
Ka jingkylla ka saiñ hima-sima ha Nongthymmai konstitwensi ka la poi sha u pud ba u MLA ka All India Trinamool Congress (TMC), Bah Charles Pyngrope u la sah marwei namar ki nongïalam bad nongtrei jong u mynta ki la leit phai noh lut biang sha ka Congress.
Kane ka la nang pynduh mynsiem ïa ka TMC ha kane ka jylla khamtam hadien ka jingbym lah ban jop ïa ka ilekshon MLA shiteng samoi ha Gambegre konstitwensi dang shen.
Ki nongïalam ka TMC kiba kham hakhmat kiba ju don bad u Bah Charles ki la shah pdiang burom ha Congress Bhavan ha ki nongïalam ka Congress na East Khasi Hills District bad Shillong City ha ka jingdonlang u MLA Bah Ronnie V Lyngdoh, u MDC Bah PN Syiem, ka Deborah Marak, Antonio War, Manuel Badwar, Dr Omarlin Kyndiah lem bad kiwei kiwei.
Da ki spah ngut ki paidbah kiba ju kyrshan ïa kiwei pat ki seng saiñ pyrthei ha ki 4 tylli ki konstiwensi ki la wanphai biang sha ka Congress ha kaba la pdiang sngewbha ïa ki ha Congress Bhavan ha ka Sngi Thohdieng.
Nalor ki nongkitkam bad nongtrei ka TMC ha Nongthymmai, kine ki spah ngut kiba la wan pynïasoh ki kynthup na Mawthadraishan, Jirang, bad Sohïong.
Haba ai jingkren ha kane ka sngi, u Bah Alan Victor uba dei uwei na ki nongïalam ka TMC ha Nongthymmai u la ïathuh ba ïa ka TMC la khylliap lama noh ha Nongthymmai konstitwensi namar ki nongïalam bad ki nongkyrshan ki la wanphai biang sha ka Congress kaba dei ka kmie.
U Bah Alan u la ong ba ki la don kumba 1500 ngut kiba la dep pynrung kyrteng ban wan sha ka Congress bad yn sa pyni ïa ka jingkhaiñ jong ka Congress sa shisien.
U la ong ba wat lada ki la long kum ki khun sarong ïa ka Congress hynrei kane ka jingwanphai sha ka ïing kmie kan long junom.
U la ong ruh ba ka sur kaba lah ban sawa ha ka ri baroh kawei ka dei ka sur jong ka Congress, bad na kane ka jylla ruh ym don ka jingsah marwei namar ka Congress ka don beit ha kiwei ki Jylla.
Kumta u Bah Alan u la ong ba nangne shakhmat yn ïatreilang ban khyllie pat ïa ka Congress kaba don hapdeng ka jingtlot.
La ïoh ruh ki jingkren na ki ‘riew rangbah na Sohïong, Mawthadraishan bad Jirang nalor ki jingkren na ki nongïalam ka Congress kiba la ai ka jingkyrmen ïa ka Congress ba kan nang khlaiñ biang nangne shakhmat.
U Bah PN Syiem u la ong ba ka ilekshon MDC ha u snem 2025 ka dei ka semi final bad ka Congress kan sa jop ha ka ilekshon MDC ban ïakhun sa ïa ka final.
