Jowai, Nohprah 01
U Symbud Myntri Rangbah ka Jylla bad MLA ka Nartiang Bah Sniawbhalang Dhar u la buh mawnongrim na ka bynta ban sdang pyntrei ïa ki surok ba 100 klur hapoh ka Nartiang Konstitwensi ha ka jingïalang kaba la long ha Pdein Mukhim ha ka 30 tarik Naiwieng.
Kine ki projek surok ki kynthup ïa ka surok Ummulong Nartiang Road, Pdein Mukhim, Sohphoh Mookabeng bad Kdohkule hapoh ka State Roads Fund jong u snem 2024-2025 bad la mang ban pyndep hapoh u Lber (March) 2025.
Ha kane kajuh ka sngi u Bah Sniawbhalang u la pynbna ban wanrah kam pynroi hapoh ka shnong Wahïajer lyngba ka tnat Tourism kaba la kynjoh 2 klur tyngka.
Kine ki surok 100 klur ki kynthup ïa ka Sohphoh-Mookabeng Road ha ka jingjrong 3.780 Km ha ka jingheh kaba 3.75 metre ba shongdor 12.563 klur, Kdohkule Internal Road ha ka jingjngai 3.395 Km ha ka jingheh 3.75 metre ha ka dor 10.931 klur.
Ka surok Mynpun Pdein Mukhim Road, Wahïajer ha ka jingjrong 4.080 Km ha ka jingheh 5.50 ha ka dor 13.803 klur bad ka jingpynjlih bad pynheh ïa ka surok haduh 7 metre ïa ka surok Ummmulong-Nartiang kynthup ïa ka Intermediate Lane kaba 2.70 Km, Four Laning 2.97 Km bad Double Lane 4.33 Km ha ka jingjngai kaba 10.00 Km kaba la kynjoh sha ka 62.703 klur.
Ïa ka jingïalang buh mawnongrim la pynïaid da u Superintendent Engineer PWD (Roads), Jowai Circle Bah MK Kharnaïor ha ka jingdonlang u MLA ka Jowai Bah Wailadmiki Shylla, MLA ka Umroi Damanbait Lamare, CEM JHADC Bah Thombor Shiwat, u Chief Engineer PWD (Roads) Bah D Langstang, Superintendent Engineer ka tnat Tourism Bah M Marbaniang, ki MDC JHADC, ki ophisar Sorkar, ki nongïalam shnong bad nongshong shnong nalor kiwei kiwei.
Ha kane hi kajuh ka sngi u Symbud Myntri Rangbah u la pyllait paidbah ruh ïa ka kali kit nongpang na ka bynta ban pyndonkam ka Muliti Sports Complex Management Development Society, Wahiajer.
U Bah Sniawbhalang ha ka jingkren u la ïathuh katto katne ki kam pynroi bapher bapher kiba u la wanrah hapoh ka konstitwensi kumjuh ka jylla, kynthup naduh ka jingpynbha ïa ki surok poh shnong, ki surok sha ki jaka rep jaka riang ban pynsuk ïa ki nongrep ban pynpoi ïa ki mar ki mata sha ki ïew ki hat.
