Shillong, Nohprah 01
Ka Sorkar Jylla ka la buh thong ban pyndep noh ïa ka surok Shillong-Dawki hapoh u snem 2026. Kane ka surok kaba la dei ban pyndep ha u snem 2022 ka la sahteng namar ka jingslem ban ïoh ïa ki jaka, ban ïoh jingbit ban mait ïa ki khlaw bad ruh namar ba hap ban pynkynriah lynti ïa ki pipe um ba la pynpar na ki jaka ba thmu ban tih ïa ka surok.
U Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong u la pyntip ba ka jingpyntrei ïa ka surok mynta ka la ïaid stet bha kynthup ïa ka surok Four-lane naduh Umshyrpi haduh Mylliem, ha kaba u la ïathuh ba ïa ka package kaba saw jong katei ka projek mynta la pyntrei bad ka la ïaid shakhmat.
U la ong, kaba sah mynta ka long ban ïoh jaka na ka bynta ka Pynursla Bypass kaba hap hapoh ka Package-III.
“Ngi buh thong ban pyndep beit ïa kane ka surok ha u snem 2026, na ka bynta kane ki kompani kiba pyntrei naduh ka Package-I, Package-II, Package-III, Package-IV bad Package-V ki la pynstet bha ïa ka kam. Kaba sah mynta ka long tang ban pyndep ïa ka jingshim jaka na ka bynta ka Pynursla bypass kaba hap hapoh Package-III”, la ïathuh u Bah Prestone.
Katkum ka jingong u Bah Prestone, baroh saw tylli ki kompani kiba pyntrei ïa katei ka surok ki la wanrah da ki kor ki bor kiba khlaiñ, bad ki la pynbun ruh ïa ki nongtrei ba kin trei haduh 6-7 jaka ha ka shisien trei.
“Kumba ka paw mynta ka pyni ba ïa ka surok yn lah beit ban pyndep katkum ka por. Lada ki trei kumne 6-7 jaka ha kawei ka package ha kajuh ka por, nga kyrmen bad nga ngeit ba kin lah ban pyndep ha ka por kaba biang”, u la ong.
Haba ïathuh halor ka jingshim jaka na ka bynta ka surok Pynursla by-pass, u Symbud Myntri Rangbah u la ong, “Ngi la pynbeit bad ki trai jaka, kumjuh ki raid, ki shnong bad nga tharai ba kin ym bun than ki jingeh. Ïa kiba la dep ka jingeh ka long ba ha ka por ba ai kyrteng paw u A hynrei da la dep mih ka jingpynbna mih sa u B kiba kam ba ka jaka ka dei jong ki. Teng-teng don kiba ong ba ai mei ïa nga, don pat kiba kam ba ai u kñi, don bun syrtap bad kane ka pynslem ban aiti ïa ka jaka.”
U Bah Prestone u la ong ba ka daw jong ka jingieh khlem pyndep jong kawei ka kompani kaba pyntrei ïa katei ka surok mynshwa ruh ka dei namar ka jingslem ban ïoh ïa ka jaka.
“Kumba ka long mynta 90 percent na ka jaka la dep ban aiti ha ki kompani ban pyntrei noh wut-wut ïa ka kam”, u la ong.
Ka surok Shillong-Dawki kaba jrong 90 km ka don haduh ka Package kaba san. Ïa kane ka surok la bei pisa da ka Japanese International Cooperation Agency (JICA) ha ka jinglut kaba long T.1377.5 klur.
