Shillong, Nohprah 01
Ki Nongïalam ka BJP hapoh ka jingïalam jong u Bah A.L Hek, uba dei ruh u Myntri ka Sorkar Jylla, ki la leit ban ïakynduh ïa ki samla pule doktor hapoh ka North Eastern Institute of Ayurveda & Homoeopathy (NEIAH) Medical College, Mawdiangdiang Shillong kiba dang pule ha ka kyrdan Post-Graduate kiba shong ïakhih shah thgnan kaba khlem buh por ha Mawdiangdiang.
Ha kane ka jingleit ïakynduh ki Nongïalam jong ka BJP ki la kyntu ïa kine ki samla pule PG kiba dang ïai bteng ïa ka jingïakhih kaba la kot sha ka hynriew sngi ha ka sngi Saitjaiñ ba kin sangeh noh shuwa shipor ïa ka jingïakhih ka jong ki, khamtam lei hadien ba kawei na ki samla ba don bynta ha ka jingïakhih, ka la poi hospital na ka daw jong ka jingshitom.
Shuh shuh haba kyrpad ban pynsangeh noh shwa shipor ïa kane ka jingïakhih shong shah thngan, ki Nongïalam jong ka BJP ki la kular ïa kine ki samla pule ba kin sa shimkhia ban ïakren bad ka Sorkar Pdeng.
Ha kane ka jingleit sha NEIAH ki Nongïalam ka BJP ki la ïakynduh ïa ki bor ba peit ïa ka jaka pule ha kaba la pynshai ïa ka jingeh jong ki samla kaba ki la dawa ban pynkiew ïa ka baibam, ka jingpynïasoh bad ka skulbah NEHU.
Katkum ka jingpynshai na ki bor pynïaid jong ka NEIAH, ki Nongïalam jong ka BJP ki la sngewthuh ba ïa ki jingdaw kiba hakhmat eh jong ki samla pule lah ban pynurlong hapdeng phra bad shiphew sngi, kane ka long katkum ka jingbatai kiba pynïaid ïa katei ka jaka pule.
