Khliehriat, Nohprah 01
Da ka jingthmu ban pynsngewthuh halor ka jingshah ban beiñ ki kynthei, ka Meghalaya State Rural Development Society (MSRLS), East Jaiñtia Hills District ha ka 29 tarik Naiwieng ka la pynlong ïa ka District Level Campaign pyrshah ïa ka jingshah lehbeiñ ki kynthei ha Khliehriat.
Ha kane ka jingïalang la ïadonlang u Assistant Commissioner, East Jaiñtia Hills District, S Malviya, Project Director District Rural Development Agency (DRDA), Dr. T Shylla, ki VO bad SHG.
U S Malviya ha ka jingkren u la ban jur halor ka jingktah jong ka jingshah thombor ha ki longïing longsem, ki khynnah bad ka imlang sahlang baroh kawei.
U Bah G Warjri u la ïaroh ïa ka jingïashim bynta shitrhem jong ki dkhot ka SHG bad kyntu ïa ki ban shim ïa ki sienjam kiba shimkhia ha la ki jong ki shnong ha kaba ïadei bad kane ka bynta.
Shwa kane, ki riew shemphang kiba mihkhmat ïa ka District Legal Services Authority (DSLA), ka One Stop Centre (OST) bad ka tnat pulit ki la ïasam ïa ki jingmut jong ki halor ki jingshakri ba la pynbiang na ka bynta ki kynthei, ki jingeh ba ki ïakynduh, ki case jong ka jingshah lehbeiñ ha ka liang ka kynthei bad shynrang, ka jingpynïaid ïa kum kine ki mukotduma, ki aiñ kiba ïadei bad ka jingshah lehbeiñ ki kynthei, bad kiwei kiwei.
