Shillong, Nohprah:
U MLA ka UDP na Nongpoh konstitwensi, Bah Mayralborn Syiem u la ong ba ka jingïakhun pyrshah ïa ka jingjyllei jong u drok ka dei ban long da ka jingïatrei lang da baroh hapoh ka imlang-sahlang.
“Kane kam dei tang ka jingïakhun jong ka Sorkar marwei, ka dei ka kamram jong baroh lang ban ïakhun da ka jingsngewkhia. Ki paidbah ki dei ban kyndit noh, kum ki nongmihkhmat ngi la wad ïa ki lad ki lynti, ngi la sdang ban pynsngewthuh paidbah bad la shim ki lynti ban tehlakam ïa u drok, da ka jingïatreilang suki-suki ngin sa jop”, la ong u Bah Mayralborn haba kylli halor ka jingbym lah ka Sorkar ban tehlakam ïa ka jingjyllei jong u drok.
Katkum ka jingong u MLA, ka Sorkar ka la ïakhun tyngeh pyrshah ïa u drok hapoh ka Jylla wat la ki don shibun ki jingeh.
“Nga ïohi ba ka don ka jingshim khia na ka Sorkar ha kaba ïadei ban pynduh ïa u drok, ha kaba la sakhi ba bunsien la ïoh kurup ïa u drok da ki ANTF ha kylleng ki district ka Jylla, nalor ka jingpyrshang ka Sorkar Jylla la ïohi ruh ïa ka jingmih shakhmat ki dorbar shnong bad ki nongïalam shnong ban ïatreilang kumjuh ki kynhun trei mon sngewbha bad ki seng ban ïakhun pyrshah ïa u drok”, u la ong shuh shuh.
Ha kaba ïadei bad ki jaka sumar jong ka Sorkar ïa kiba dih drok, u Bah Mayralborn u la ong ba ka la dei ka por ba ka Jylla kan don noh ïa ki jaka sumar kiba pynïaid hi da ka Sorkar, ha kaba u la ïathuh ruh ba ha Ribhoi la phah ka jingtyrwa ban don kawei ka jaka sumar ïa ki nongdih drok.
“Kaba nga sngewkhia mynta ka dei ïa ki jaka sumar na ka bynta kiba la ngop ha u drok, ka Sorkar lane ka tnat Social Welfare ki la dei ban wanrah ïa ki jaka sumar na ka bynta ki nongdih drok. Kum u nongmihkhmat nga la ju kren ba ngi don ïa ki jaka sumar jong ki kynhun shimet, hynrei ki dei kiba rem dor. Kam dei kaba suk ïa ki longïing kiba duk ban phah sumar da kaba hap siew T.7,000 haduh T.15,000 shibnai”, u la ong.
U la ïathuh ba na ka bynta ka Ribhoi District la dep ban aiti ha u Deputy Commissioner ban thaw lad bad ban phah ïa ka jingtyrwa lyngba ka CSR projek na ka bynta ban don noh kawei ka jaka sumar ïa kiba la ngop ha u drok.
“Ka kam ka la ïaid bad nga khmih lynti ba ha snem 2025-26 kan don noh kawei ka jaka sumar ha Ribhoi, ngi kyrmen ba kane ka dei kawei ka sienjam na ka bynta ka jingkyrmen ïa ka lawei jong kito kiba la ngop ha u drok”, la ong u MLA.
