Shillong, Nohprah 01
U President ka Khasi Students’ Union (KSU), Bah Lambokstarwell Marngar u la ong ba u Vice-Chancellor (VC) ka North-Eastern Hill University (NEHU) u Prof. Prabha Shankar Shukla, u la dei ban don ïa ka mynsiem sngewrem ïa ka jinglong thurmur bad ka jingbym biang jong u ban pynïaid beit-pynïaid ryntih ïa ka Skulbah NEHU hynrei, phewse utei u VC u la dang pan pynban da ki bor pahara na ka Sorkar Pdeng ban wan shimti biang ïa ka kam kum u VC ka Skulbah ha ka 2 tarik u Nohprah 2024.
Haba kren sha ki lad pathai khubor ha ka sngi Saitjaiñ ka 30 tarik u Naiwieng 2024, u Bah Lambokstarwell Marngar, u la ong ba ka jingpyneh bad ka jingleh jong u VC kumne da ka bor, ka pyni shai kdar ba u dei u briew u bym pat biang ha ka jingmut-jingpyrkhat bad ba um don satia ïa kata ka jingkitkhlieh.
“Ha ka jingshisha, u la dei ban sngewrem bad u la dei ban shim ïa la ka jong ka jingkitkhlieh ïa ka jingleh thurmur bad ka jingbym biang ha ka ban pynïaid beit-pynïaid ryntih ïa katei ka Skulbah haduh ba ka la pynlong ruh ïa ki samla pule ba kin shong ïakhih shah thngan”, ong u Bah Lambok.
U la ong ba ha ka jingshisha une u VC u la dei ban iehnoh dalade ïa ka kam kum u khliehduh katei ka Skulbah hynrei ka jingleh jong u ka pyni pynban ba u kwah ban pynibor ïa ki samla pule bad ïa ki nonghikai jong ka Skulbah NEHU.
“Kane ka pyni ba u khliehduh jong kane ka Skulbah um don ïa kata ka jingpyrkhat na ka bynta ki samla bad ha kajuh ka por ka pyni ba um don ïa ka jingkitkhlieh”, ong u Bah Lambok.
Shuh-shuh u Bah Lambokstarwell u la ong ruh ba ka jingkynthoh jong VC ïa ka seng KSU ka long tang ba un tep eit miaw ïa ka jingbymler jong u hi ban pynïaid ïa ka Skulbah.
“Ha ka jingkynthoh jong u, ngi ïohi ba u la kdew wat ïa ka KSU bad kane ka pyni ba u briew u kwah ban tap eit miaw ïa ki jingbakla jong lade bad ban sait khuid ïa ka jingbym ler jong u da kaba sdang ban kynnoh ïa ka KSU. Kum une u jait briew u sdang ban ïalam bakla bad ban sait khuid ïa ka jingduna jong lajong, ngi kum ka seng ngin nym lah ban pdiang ba un don biang hapoh ka Skulbah”, ong u Bah Lambok.
Ha kajuh ka por, u la ong ba lada u VC un wan ban shimti biang ïa ka shuki kum u VC ka Skulbah ha ka 2 tarik Nohprah 2024, na ka liang ka seng kan sa leh ïa la ka jong ka kamram bad na ka liang ka seng ka la kren shai ba kam kwah ba une ujuh u briew un wan ban ïuhkjat biang sa shisien hapoh katei ka Skulbah ban wan pynklumar bad ban wan leh ïa ki kam thurmur hapoh katei ka Skulbah.
“Ngim tip la un wan ne um wan ha ka 2 tarik hynrei na ka liang jong ka seng kan leh ïa la ka jong ka kamram bad ngi ngeit ba ki nonghikai ruh ki don ïa la ka jong ka bynta ba kin leh”, bynrap u Bah Lambok.
