Jowai, Nohprah 01
Sa uwei u koidi jong ka Jowai District Jail and Correctional Home u la khlad noh bad la suba jur ba u la bthat jubor ïa la ka jingim hapoh kane ka patok.
Une u koidi u dei ba la tip kum u Leiki Phawa na ka Maya Club, Wahïajer, West Jaiñtia Hills District.
Ka khubor kaba la ïoh lum na ki pulit ka ïathuh ba la suba jur ba ka jingïap jong u ka dei na ka jingbthat jubor ïa la ka jingim hapoh patok ha ka por shiteng synñia jong ka 29 tarik Naiwieng. Na ka liang ki bor pulit ki la pynkit noh ïa ka met ïap sha Jowai Civil Hospital, Ïalong ban pyndep ïa ka jingdonkam jong ka aiñ.
Shi sngi shuwa ka jingïap u Leiki Phawa, uwei u koidi uba la tip kum u Tenkini Siangshai u la khlad shuwa ban poi hospital ha ka 28 tarik Naiwieng.
