Shillong, Nohprah 01
Ka Sorkar Jylla ka la pyntrei stet bha ïa ka surok kaba pynïasoh na Umroi sha Mawlai Bypass ka ban mih sha ISBT ha Mawlai Mawïong ïa kaba la tip ruh kum ka VIP Road.
U Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong u la pyntip ba kumba 80 percent ka jingpyntrei ïa katei ka surok ka la ïaid, bad la khmih lynti ban pyndep noh ha shwa ka por ba la buh.
“Kane ka kam nga lah ban ong ba la kumno-kumno 80 percent ei-ei ka la ïaid. Katto-katne ki jaka ba don ka jingeh ban wanrah ïa katei ka surok namar ka jinglong riat bad them ka jaka, hynrei na ka liang ki karikor bad ka kompani kaba pyntrei ki la leh ïa kaba donkam ba kan kham suk, nga kyrmen skhem hi ba kan ym slem ban dep”, la ong u Bah Prestone.
U Symbud Myntri Rangbah u la ïathuh ruh ba na ka por sha ka por u ju lum ïa ka jingïalang ban bishar ïa ka jingpyntrei ïa ki surok.
“Ngi la pyrshang lut kat kaba donkam ban pyndep kloi ïa katei ka surok. Ngam lah ban ong sa katno bnai kan shim por lane ha u bnai aïu ba ngin dep, hynrei ngin pyrshang beit ban pyndep kloi katba lah”, la ong shuh shuh u Bah Prestone.
Ka jingpyntrei ïa katei ka surok na Umroi sha Mawlai ka long ban ailad ïa ki kali heh khamtam ïa ki bus night super ba ki wan ïeng hapoh ka Inter State Bus terminus (ISBT) jong ka Sorkar ha Mawïong, namar hadien ba la khang ban ïaid ïa ki kali heh na ka jingkieng Umïam katei ka jaka pynïeng bus jong ka Sorkar kaba la tei ha ka jinglut kaba T.48 klur ka la shu sah khongreng ba ki bus ki hap ban ïeng sharum jong ka jingkieng.
Dang shen u Symbud Myntri Rangbah ba khmih ïa ka Tnad Transport, Bah Sniawbhalang Dhar u la ong ba ka tnat ka la phah ïa ka jingkyrpad sha ka tnat PWD ba kan pynkloi noh ïa ka jingshna ïa kane surok kaba mih na Umroi sha ISBT ha Mawlai Mawïong.
U la pynpaw ka jingkyrmen ba hadien ba la dep kane ka surok, ki bus ba heh kin sa lah ban wan kamai biang na ISBT.
U Bah Dhar u la pyntip ba ïa mynta namar ka jingpyrkhing ïa ki kali heh bad ka jingkhia jong ki kali ba ïaid na jingkieng Umïam, ka la ktah bha ïa ki nongpynïaid bus bad kumjuh ïa ki trai dukan ha ISBT.
