Shillong, Nohprah 01
Ka Dorbar Bah kaba phra jong ki kynthei bad longkmie ka Balang Katholik jong ka Jylla Niam Bah Shillong, la pynlong ha ka Sngi U Blei ha ka Shnat Niam U Paulus Bakhuid Upper Shillong Zone 1. Ha kane ka Dorbar Bah ka ktien mat puson la sot na ka Shithi Ba Nyngkong u Paulus Apostol Bakhuid sha ki Thessalonika (1Thessalonika 5:17) “Wat ju pep ban duwai”.
Ha kane ka sngi u Archbishop Victor Lyngdoh u la long u kongsan ban pynmynta ïa ka nguh ka dem Blei.
U Archbishop Victor Lyngdoh u la ïathuh ba ha ka mat ïatai jong ka dorbar pyllun ki kynthei, ka Synjuk ki Seng Kynthei Katholik jong ka Shillong Archdiocese ka la shim ïa ka bynta jong ki ïing ki sem ban im ha ka jingduwai.
Haba pashat ïa ka pasoh jingdwuai ki longkmie ha kane ka lympung, u Archbishop u la ai tang lai tylli ki mat, kata ka longkmie ban seng ban duai ïa ka ïing ka sem, ka longkmie kaba kit ïa ka eh ka shon bad kaba pynroi ïa ka pyrthei da ki khun shynrang bad kynthei.
U la ong ba ka longkmie ka dei ka dohnud ïa ka ïing, ka Balang, ka imlang-sahlang bad ka jingim mynsiem. Ka jingdon ka kynthei kaba janai da ka jingieid ban don ka jingpynkylla ïa ka pyrthei da ka jingim kaba thymmai bad kaba skhem.
Kum u khliehduh ka Shillong Archdiocese, u Archbishop Victor Lyngdoh u la pynpaw ka jingsngewnguh ïa ki longkmie ka Jylla Niam Bah ba ki pyndap pynshngaiñ ïa ka Balang.
Ka Dorbar Bah ki Longkmie ka Shillong Archdiocese hapoh ka jingïalam u Spiritual Director ka Synjuk, u Sohblei Alfred L Nongbri, ka President jong ka Synjuk, Kong Kiltiiora Marbaniang bad ka Secretary, Kong Joplin Nongdhar ki la lah ban lum ïa ki longkmie bad samla kynthei da ki phew hajar ngut na hynñiew tylli ki Zone ka East Khasi bad Ribhoi district.
Ha jinglehniam Bakhuid kiba la synran ïa u Archbishop ki long u Sohblei Tobias Kharngapkynta Nongsharai Rangbah ka Shnat Niam Upper Shillong, u Sohblei Leo Mary Lyndem, u Sohblei Sylbanus Nongkynrih bad kiwei pat ki Lyngdoh niam.
Ha kane ka dorbar kaba phra, ka Synjuk ka la shim rai bad mynjur ïa ka jingïamir jingmut ha ki ar sngi da ki kyntien jingduwai “Ban nym pep ban duwai”.
La pynkut ïa kane ka lympung dorbar da kaba pynhiar ïa ka lama da u Archbishop Victor Lyngdoh bad u Spiritual Director, u Sohblei Alfred L Nongbri bad ka jingpynbna ïa ka dorbar pyllun ka ban sa long ha u snem ban wan da ka Zone II ha Ïingmane Bah, Laitumkhrah.
