Shillong, Nohprah 01
U MLA ka Bharatiya Janata Party (BJP) na South Shillong Konstitwensi u Bah Sanbor Shullai u la pynthikna ba ha u snem 2025 bad ha u bnai Naitung un sa bam smai kum u Myntri ka Sorkar Jylla.
Ïa kane u Bah Sanbor u la kren bad pynthikna haba ai jingkren ha ka jingïalang ba la pynlong ha Lumparing haba plie ïa ki lai tylli ki projek shna surok. “Nga pynthikna ba ngan sa bam smai kum u Myntri ka Sorkar Jylla ha u bnai Naitung 2025 namar na ka BJP, kaba la ïateh ban ïa sam mar ar snem shiteng bad u Bah A.L Hek,” u la ong.
Kumba ka long mynta, ka BJP ha Meghalaya ka don ar ngut ki MLA kata u Bah Sanbor Shullai bad u Bah A.L Hek, bad kaba don lang ruh ha ka Sorkar MDA, ha kaba u Bah AL Hek u la long ruh uwei na ki Myntri ha kane ka Sorkar bad ka la don ruh ka jingïakren ba ka la don ka jingïapynbeit bhah na ka bynta ka shuki Myntri hapdeng kine ar ngut ki MLA ka BJP.
U Bah Sanbor u la ong lada u la ïoh long kum u Myntri ha ka Sorkar Jylla, ki kam pynroi kin sa wan shuh shuh hapoh ka konstitwensi.
Shuh shuh u Bah Sanbor u la pynpaw ba um ju leit sha ka tamasa Cherry Blossom bad haba u long Myntri Sorkar ruh um donkam pulit ban pahara namar um don jingtieng haba u dei u briew uba ïarap beit ïa ki paidbah.
Ha kawei pat ka liang, u Bah Sanbor Shullai u la pyntip ba u pyrsa jong u, Bah Ricky Shullai un sa ïakhun kum u kyrtong shimet ha ka ilekshon MDC ka ban sa long na Laban-Mawprem konstitwensi.
Haba ïoh ban ïakren bad u nongthoh khubor, u Bah Sanbor u la ïathuh ba wat la u dei u MLA ka BJP hynrei un ym pynïakhun ïa u Bah Ricky na ka BJP namar ki nongkyrshan ki kwah ba ha ka ilekshon MDC u hap ban ïakhun kum u kyrtong shimet.
“Nga hap ban trei shitom ïa u Bah Ricky Shullai ha kane ka ilekshon khnang ba un lah ban ïoh biang ïa ka jingjop ha ka ilekshon MDC ka ban sa long shen,” u la ong.
Kane ka jingtrei shitom u Bah Sanbor na ka bynta u Bah Ricky ka la sdang paw pyrthei haba u ai jingkren ha ki jingïalang haba u plie ïa ki skhim shna surok ha Lumparing bad Madan Laban mynha ka Sngi Saitjaiñ namar u la ai ksai ïa ka kyrteng u Bah Ricky namar u dei u samla uba trei shitom ban ïarap ïa u ban pynïaid ïa ki kot ki sla kiba dei ki jingdonkam jong ki paidbah bad ki ophisar sha Secretariat.
U la ban jur ruh ïa ki paidbah ba ki dei ban don ka jingsngewnguh haba kum u MLA u la trei na ka bynta ka jingmyntoi jong ki paidbah bad haba u donkam ka jingkyrshan kim dei ban kyntait hynrei kin ai jingkyrshan ïa u ha kano-kano ka por ba u wan pan jingkyrshan.
