Nongpoh, Nohprah:
Kumba 90 ngut ki ophisar pulit na ki jylla ka Thaiñ Shatei Lam Mihngi, kiba kynthup ïa 6 ngut ki Deputy Superintendent of Police bad 40 ngut ki Sub-Inspector na Meghalaya, 14 ngut ki Sub-Inspector na Assam, 13 ngut ki Deputy Superintendent of Police bad 6 ngut ki Sub-Inspector na Manipur bad 8 ngut ki Deputy Superintendent of Police lem bad 3 ngut ki Sub-Inspector na Nagaland ki la lah ban pyndep ïa ka jingshah hikai ha North East Police Academy (NEPA) kaba don ha Umïam ha ka Sngi Thohdieng lyngba ka ‘Passing-Out-Parade’ kaba la tip ruh kum ka ‘Dikshant Parade’.
Ha kane ka sngi, u Myntri Rangbah ka Jylla, u Conrad K. Sangma, u la wan ban shimti ïa ka bynta kum u kongsan, ha ka jingdon ryngkat jong u Danesh Dana, Director ka NEPA, ki heh pulit na Meghalaya bad Assam nalor ki nongshah khot sngewbha bad ki bahaïing bahasem jong kitei ki ophisar pulit kiba la pyndep ïa katei ka jingshah ai jinghikai.
Ïa kitei ki heh ophisar pulit kiba pyndep ïa kane ka jingshah hikai kaba shisnem kynthih mynta ka sngi, la pynbam smai da u Danesh Rana, Director ka NEPA ha shwa ba kin leit pat ban shimti ïa ka kam ha ki Jylla lajong, katba ïa ka ‘Passing-out Parade’ pat la ‘Command’ da u D. Theingam, Deputy Superintendent of Police jong ka tnad pulit ka Manipur.
Haba ai jingkren ha kane ka sngi, u Myntri Rangbah , u Conrad K. Sangma u la pynpaw ïa ka jingsngewkmen bad jingsngewhun ban ïadon bynta ha kane ka ‘Passing-Out-Parade’ kaba 53 jong ka NEPA bad ai khublei kyrpang ruh ïa u Director ka NEPA, u Danesh Rana uba la khot sngewbha ïa u bad ruh ïa ki heh ophisar pulit kiba la pyndep ïa ka jingshah hikai lem bad ki bahaïing hasem ki jong ki, kiba la wan ban ïadon bynta ban pynshit pynshngaiñ ïa kane ka prokram.
U la ong ruh ba kane ka shlem ai jinghikai kaba la seng naduh u snem 1978 ka la synñiang shi kat dei ban wanrah ïa ka shongsuk shngaiñ ïa ka Thain Shatei Lam Mihngi lyngba ki jinghikai bapher-bapher kiba ki ophisar pulit ki la ïoh. U la pyntip ruh ba ha kine ki 46 snem jong ka jingshakri, kane ka shlem ai jinghikai, ka la lah ban pynmih palat 36,088 tam ki ophisar pulit – ki la ïoh ia ka jingshah jinghikai pyntbit ha ki liang bapher-bapher kiba ïahap bad ïadei katkum ka juk bad jingkylla ka por kaba mynta.
Kumban shu kdew hangne, ka NEPA ka dei ruh ka shlem ai jinghikai kaba la ïoh ïa ka nam ‘Union Home Ministers’ Trophy’ halor ka jinglah jong ka ban long kum kawei na ki shlem ai jinghikai kaba paka tam ha ka ri ha u snem 2015-16 bad 2021-22 bad kaba la ithuh ruh kum ka shlem ‘UTKRISHT’ da ka CBC & NABET, New Delhi ha u snem 2023.
