Shillong, Nohprah 01
Ka Hynñiewtrep Integrated Territorial Organisation (HITO) Nongbah Marshillong Unit kaba hap hapoh ka jingpeit-jingkhmih jong ka HITO South West Khasi Hills District ha ka 30 tarik u Naiwieng 2024, ka la ïai bteng biang ha ka ban sam ïa ki kot lyngkdop ha kaba ka la ïasyllok ruh bad ki paidbah halor ban pyrshah ïa ka jingpynkiew bai thang bording ilektrik da ka Sorkar bad na ka liang ki paidbah ruh ki la pynpaw ba ki la long kiba la kloi ban ïa mih paidbah ha kano-kano ka por ban pynpaw ïa ka jingpyrshah halor kane ka jingthmu.
Kum ban shu kdew hangne, ka Meghalaya State Electricity Regulatory Commission (MSERC) ha ka 24 tarik u Naiwieng 2024 ka la pynmih ïa ka hukum ha kaba ïadei bad ka jingpynkiew ïa ka bai thang bording ilektrik kaba la ktah shikatdei eh ïa ki nongshong shnong ka Jylla na ka bynta u snem 2024-2025 kaba dei naduh ka 1 tarik u Ïaïong 2024. Kumta na ka liang ka HITO ka la dawa na ka Sorkar ba ka dei ban pynjari noh da ka Section 65 jong ka Indian Electricity Act, 2003 ha ka ban pynsting ïa ka bai thang bording na ka bynta ki paidbah kiba pyndonkam ha ki ïing ki sem.
Katkum kane ka hukum baroh ki paidbah kiba pyndonkam ïa ka bording hapoh ka 200 unit, kin hap ban siew ïa ka bai bording ha ki khyndai sien siew ka ban sdang naduh u bnai Nohprah 2024. Kane kan treikam tang na ka bynta kiba thang bording ha ki ïing ki sem bad ym na ka bynta kiba thang ha ki jaka pyntrei ne ki karkhana.
Na ka liang ka seng ka la dawa ba ka Sorkar Jylla ka dei ban pynsangeh noh mardor ïa kane ka hukum kaba long ka jingban beiñ ïa ki paidbah bad pynrem jur ruh halor ka jingphah siew bai thang bording ilektrik biang jong ka Sorkar Jylla ïa ki paidbah naduh ka 1 tarik Ïaïong 2024.
