Shillong Nohprah 01
Ka Congress ka khot ka wer ïa ki paidbah ka Jylla ba kim dei ban shah ïalam bakla namar ka 6th Schedule ka dei kaba khlaiñ ban ïada ïa ki jaidbynriew trai ri trai muluk ban ïa ka Article 371.
U MDC ka Congress u Bah PN Syiem u la ong ba ha Arunachal Pradesh bad Ladakh ka don ka jingkwah ban pyntreikam ïa ka 6th Schedule namar ki sngewthuh ba ka kham khlaiñ ka 6th Schedule ban ïa ka Article 371.
“Ki sngewthuh ba ka 6th Schedule ka kham lah ban ïada bad lada kam dei kumta, kumno kim dawa da ka Article 371,” la ong u Bah Syiem, uba dei ruh u Deputy CEM ka KHADC.
U la ong ruh ban phohsniew shaphang ka Article 371 hapoh ka jingsynshar ka NDA ka long kaei kaei ka bym lah mutdur bad lada dei pynban ba synshar ka UPA, ka don ka jingkyrmen.
Na ka liang u Bah Ronnie V Lyngdoh u la ong ba ka jingphai biang ki paidbah sha ka Congress ka dei namarba ki sngewthuh ba ka jingshngaiñ ha ka synshar ka khadar ka dei lyngba ka Congress.
U la ong ba u Sanam Wanchuk, u samla uba ïalam ïa ka jingïakhih ha Ladakh u la ïaid kjat shaduh Delhi ban dawa pyntreikam ïa ka 6th Schedule ha Ladakh.
U Bah Ronnie u la ong ruh ba lada ka Article 371 ka lah ban ïada, balei ha Dimapur kaba ha Nagaland ka la kylla ritpaid namar la jyllei da kiwei pat ki jaidbynriew.
U la ong ba lyngba ka jingdon ka 6th Schedule, ka Panchayati Raj kam ïoh ban rung hynrei ki don pat ki jylla kiba pyntreikam da ka Panchayati Raj bad kan long ka jingduhnong ïa ka jaidbynriew lada ym don.
“Namarkata, ki paidbah kim dei ban shah ïalam bakla namar ban ïa ka Article 371 ka dang khlaiñ hi ka 6th Schedule,” la bynrap u Bah Ronnie.
