Shillong, Nohprah 01
Ka Social Action For Human Rights (SAFHR) kaba ka ïatreilang bad ka Labour & Migrant Commission Archdiocese of Shillong hapoh ka jingpeit jingkhmih ka Social Service Centre, bad kaba la kyrshan da ka Mano Unidas, Spain, ka la pynlong ïa ka Seminar kaba saw sngi halor ka phang kaba ïadei bad kumno ban ïoh ïa kiba trei mon sngewbha kiba tip shaphang ka aiñ lyngba ka jinghikai ïa ki aiñ, ki skhim bapher bapher bad ki buit ban pynsngew bad ïasaid.
Ïa kane ka Seminar la pynlong naduh ka 28 tarik Naiwieng haduh 1 tarik Nohprah bad la plie da u MLA ka Mylliem u Bah Ronnie V Lyngdoh uba dei ruh u Chief Whip ka liang pyrshah kum u kongsan ha ka jingsynran lang u Archbishiop Victor Lyngdoh DD ryngkat bad u Rev. Fr. Richard Majaw u Vicar General ka Shillong Archdiocese.
Ha kane ka Seminar, la ïakren bun ki mat kum ha ka jingsdang ban tip ïa ki aiñ, ka rukom bishar ha India, ka jingdon ki briew kiba don jingtip shaphang ka aiñ, ki aiñ kiba ïadei bad ka hok ban tip, ka jingkyrshan ei ban ïakhun mukotduma bad kiwei pat ki lad ban pynbeit ïa ki jingïakajia, ka jingpynïoh ïa ka jingbishar bahok, nalor ka rukom synshar tynrai bad ka jingïadei bad ki aiñ.
Nalor kine la ïakren ruh shaphang ki skhim kiba long ki jingshngaiñ bad ai jingmyntoi (Social Security and Welfare Schemes) kiba lah ban ïoh na ka Sorkar Kmie bad Sorkar Jylla, ka rukom sam marbam bad ki aiñ nalor ka hok ki khyllung, ki aiñ ïa kiba trei bylla bad ki jingmyntoi kiba dei ban ïoh na ka tnat Labour, ki hok longbriew manbriew kiba kdew da ka Riti Synshar ka ri India bad ki aiñ ka pyrthei kiba pyntreikam da ka Ïingbishar jong ka ri India
Ha ka sngi kut la ai jingpynshai ruh halor ka tnat pynroi nongkyndong bad ka skhim MGNREGA 2005 ki lad ai jinghikai pyntbit kiba ki nongïashim bynta ki lah ban pyntbit shuh shuh ïalade.
La kyntu ïa ki nongïashim bynta ban sam lem ïa ki jingtip kiba ki la ïoh lyngba kine ki jinghikai sha ki para nongshong shnong.
Na ka liang ka SAFHR ka la pynpaw ka jingsngewnguh ïa ki nongwan ai jingpynshai halor kitei ki phang naduh Sr. Shobha K.P CFMSS, Advocate Guwahati High Court, Abinash Nazary Lawyer, Programme Manager ka SAFHR, Firstla Kupar lawbor Advocate Peter Dohkrut, Advocate, Kynpham V. Kharlyngdoh, Kong E. Kharchandy District Social Welfare Officer, East Khasi Hills, Kong Melinda Marbaniang, Nursing Supervisor Mawphlang CHC, Miss Evangelyne Lawai, Food Civil Supplies and Consumer Affairs, Kong Daisy Thangkhiew, Advocate for Child Rights, Kong Yasminda Lamin, Labour Inspector bad Bah Peter Passah, Project Director DRDA East Khasi Hills.
