Shillong, Nohprah 01
Ka Ministry of Education ka Sorkar Pdeng ka la aipor biang sa 15 sngi ïa ka committee jong ar ngut ki dkhot ban aiti ïa ka kaiphod kaba pura halor ka jingtohkit ïa ki jingkynnoh pynïaid kam bakla bad jingbym biang ka rukom treikam ha ka skulbah North Eastern Hill University (NEHU).
Kane ka la mih hadien ba ka jingbuh por ïa ka committee ban pyndep ïa ka jingtohkit pura ka la kut noh ha ka 29 tarik Naiwieng.
Ha ka shithi ba la phah da u Under Secretary ka Sorkar Pdeng u DK Himanshu sha u Chairman jong ka Inquiry Committee, NEHU bad Chairman barim ka UGC Prof DP Singh ha ka Sngi Thohdieng ka la ong “Haba ïadei bad ka shithi ka Ministry ba 14.11.2024 bad ka shithi u Chairman ka Inquiry Committee ba 28.11.2024, la ong ba ka bor khmih ka la aibor biang sa 15 sngi ban pyndep ïa ka jingtohkit bad aiti ïa ka kaiphod”.
Ha ka 14 tarik Naiwieng, ka Ministry of Education ka la thung ïa ka committee jong ar ngut ki dkhot ban tohkit ïa ki jingkynnoh pynïaid kam bakla bad jingbym biang ka rukom treikam hapoh ka skulbah.
Ïa kane ka rai la shim halor ka jingïakhih shah thngan ba khlem pud sngi da ka North Eastern Hill University Students’ Union (NEHUSU) bad kyrshan da ka Khasi Students’ Union-NEHU Unit, kiba dawa ban weng kam mardor ïa u Vice Chancellor Prof PS Shukla, u Registrar bad Deputy Registrar.
Ha ka 25 tarik Naiwieng, ar ngut ki dkhot ka committee ki la ïakynduh bad shong ban sngap ïa baroh ki kynhun seng ka NEHU ba kynthup ïa ki samla pule, ki Nonghikai bad ki Nongtrei, kiba la phah ïa ka khubor kaba shai ba kam pher la ka jingmih ka long kumno-kumno ruh na ka jingtohkit, ka jingwan phai biang jong u Vice Chancellor ba mynta sha ka skulbah ka dei ka bym ïahap bad ka bym pdiang shuh da ki.
Ha ka hukum, ka Ministry ka la ong, “Namar kine ki jingpynsngew jong ki samla pule bad ki khubor ba mih ha ki lad pathai khubor, ka la rai ban thung ïa ka Inquiry Committee halor ki jingkynnoh pynïaid kam bakla bad jingbym biang ka rukom treikam hapoh ka NEHU, Shillong”.
Ka la ong ba ki jingkynnoh ki la poi sha ka Ministry bad kine ki kynthup ïa ka jingnang hiar kyrdan ka skulbah, ka jingthung kam ba jyrwit-jyrwat, ka jingkiar ban pynbiang ïa ki jingtei ba kongsan bad ka jingmynthi jong u Vice Chancellor ïa ki jingud jingnam.
