Shillong, Nohprah:
Ka Sorkar Jylla ka la rai ban bei pisa na ka bynta ban shna noh ïa ka surok Nongpoh-Umden-Sonapur hadien ka jingkhmih lynti kaba la slem na ki paidbah jong ka thaiñ.
Haba pyntip ïa kane ka rai jong ka Sorkar, u MLA ka Nongpoh konstitwensi, Bah Mayralborn Syiem u la ïathuh ba ka Sorkar ha ka 26 tarik mynta u bnai ka la rai ban mang `.49,53,70,500 na ka bynta ban shna ïa ka surok na Nongpoh sha Umden kaba jrong 20 km.
Ka jingdawa ban shna ïa ka surok Nongpoh-Umden-Sonapur ka la jur bha, hadien ba kawei ka longkmie ka la poi shong shah thngan syndon ha nongbah Shillong ha u bnai Jylliew mynta u snem ban pynbor ïa ka Sorkar ban shna noh mardor ïa katei ka surok kaba jngai kumba 58 km.
Haba kren ha ka sngi Thohdieng, u Bah Mayralborn u la ong ba katei ka surok ka la sahteng mynta la lai snem bad ka la wanrah jingeh shibun ïa ki nongleit nongwan kiba na ka thaiñ. U la ong ba da ka jingdon kane ka surok kumba 150-200 tylli ki shnong kin ïoh jingmyntoi.
“Ka jingpan ïa kane ka surok na ka mang tyngka ka Sorkar Jylla ka long namar lada ap ïa ka skim jong ka Sorkar Pdeng kan sa dang shim por”, u la ong.
U la ong ba ka bynta ba nyngkong jong kane ka surok ka dei na Nongpoh sha Umden kaba jrong 20 km ïa kaba la mynjur ban shna na ka skim jong ka Sorkar Jylla.
“Na ka bynta kane nga kwah ban ai khublei ïa u Myntri ba khmih ïa ka tnat PWD (Roads), Bah Prestone Tynsong, ïa u Myntri Rangbah ka Jylla bad ïa ka Sorkar kaba la sngap ïa ka jingkyrpad jong ki paidbah ban pynïoh ïa ka mang pisa kaba kloi”, u la ong.
U MLA u la ïathuh ruh ba ka bynta kaba ar jong katei ka surok ka dei na Umden sha Sonapur kaba jrong 38.600 km, bad ïa ka mang pisa na ka bynta kane la ïoh naduh 10 tarik Risaw mynta u snem lyngba ka PMGSY Phase-III kaba long `.47.20 klur.
“Na ka bynta kane ka surok la dep ban khot ïa ka tender, la khmih lynti ba ha ka taïew ba nyngkong mynta u Nohprah yn ai noh ïa ka kam sha ka kompani ba pyntrei”, u la ong.
Ha kaba ïadei bad ka surok na Nongpoh sha Umden kaba la bei da ka Sorkar Jylla, u la ong ba la kumno-kumno ha ka taïew ba ar jong u Nohprah u khmih lynti ba kin khot noh ïa ka tender.
“Nga kyrmen ba yn lah ban aiti noh ïa ka jingtrei ha ki khyndiat por ban wan khnang ba yn lah ban pyndep noh ha ka por kaba biang, ba kan lah ban pynsuk bad pynmyntoi ïa ki paidbah nongshong shnong ka thaiñ”, la ong u MLA.
Haba kylli, na ka liang u Bah Mayralborn u la ong ba kan nym don jingeh ban ïoh ïa ka jaka, namar ba ïa katei ka surok yn shna pynheh na ka surok kaba la don lypa, ha kaba u la bynrap ruh ba ka jingeh kan nym mih satia namar ka dei ka jingangnud jong ki paidbah ban ïoh ïa ka surok.
U Bah Mayralborn u la ïathuh ba ïa kane ka surok la dei ban trei naduh u snem 2023, hynrei namar ba ka dei ka surok kaba jrong bad ka jinglut kaba kot kumba `.100 klur, ka shem jingeh ban pynurlong tang na ka skhim jong ka Sorkar Jylla.
