Shillong, Nohprah 01
Ka National People’s Party (NPP) ka la kyntait war bad pynpaw ka jingbym ïahap ïa ka jingkam ba ka Voice of the People Party (VPP) kan sar bad jop kput ha ka ilekshon MDC ka ban sa long ha ki ar tylli ki Autonomous District Council, kita ka Khasi Hills Autonomous District Council (KHADC) bad Jaiñtia Hills Autonomous District Council (JHADC).
“Ka don ka jingïapher haba ïakren ïa ka ilekshon MP, MLA bad MDC”, la ong u President ka NPP Meghalaya, u Bah Prestone Tynsong uba dei ruh u Symbud Myntri Rangbah ka Jylla.
U la ong ba ha ka MP ilekshon ki paidbah ki peit bad jied ïa kito kiba lah ban mihkhmat na ka bynta jong ki sha Delhi ba kin trei ha katei ka nongbah ym dei ban shakri ha ki konstitwensi, u MP um lah hi ruh ban leit rung lane ïuhkjat ha kawei-pa-kawei ka shnong ne ki dong.
“Katba ha kiwei ki ilekshon jong ka Jylla kum ka jingjied ïa u MLA lane u MDC, ki paidbah nongshong shnong ki phai khmat sha ki kyrtong kiba ki suk ban ïakynduh bad kiba peit bad tynrong lem ïa ka khia ka shon jong ki”, la ong u Bah Prestone.
Kane ka jingkren jong u Nongïalam ka NPP ka long haba kylli halor ka jingmih ki jingkam jong katto-katne bad ki jingkynthoh na ki paidbah khamtam ha ki lad pathai social media, ba ka VPP kan sar ha ka ilekshon MDC ha KHADC bad JHADC.
Haba kren pat ha kaba ïadei bad ka jingpynkhreh ka NPP na ka bynta ka ilekshon kaba la khmih lynti ban long ha u Rymphang 2025, u Bah Prestone u la pyntip ba ka seng kan sa pynbna noh ïa ki kyrtong ha u Nohprah shwa jong ka Khristmas.
“Ngi la pynkhreh na ka bynta ka ilekshon MDC ban sa long, ngi don jingthmu ban ïakhun beit ha baroh 29 tylli ki konstitwensi ha baroh ar tylli ki district council”, u la ong
U Bah Prestone u la ïathuh ruh ba na ka liang ka seng ka la bthah sha baroh ki block bad ki unit ban phah ïa ki kyrteng jong ki kyrtong. U la ong ba ka State Election Committee haduh mynta kam pat ïoh lut ïa ka kaiphot na kiba bun ki block bad unit jong ka seng, hadien ba ngi la ïoh ngin sa shim ïa ka rai.
“Hadien ba ngi la ïoh ïa ki kyrteng jong ki kyrtong, ka State Election Committee jong ka seng kan sa bishar bniah ha shwa ban pynbna paidbah”, la ong u Bah Prestone.
Haba kylli shuh shuh, u Bah Prestone u la ong ba ka NPP kan ïakhun ïa ka ilekshon la ka jong khlem da ïateh lok lypa shwa ka ilekshon bad ki seng saiñpyrthei kiba don hapoh ka Sorkar MDA bad bynrap ruh ba kiwei ki seng ruh wat la ki don lang ha ka MDA kin ïakhun laitluid katkum ka jinglah ka jong ki.
