Shillong, Nohprah 01
U Myntri Rangbah ka Jylla u Conrad K Sangma un sa leit ban jurip ïa ka projek Ropeway ka ban ïaid na Lum Shillong sha Madan Laban ha ka 4 tarik mynta u bnai Nohprah 2024.
Haba ïoh ban ïakren bad u MLA ka South Shillong Konstitwensi Bah Sanbor Shullai u la ïathuh ba ha ka 4 tarik mynta u bnai un sa don ryngkat ban synranlang ïa u Myntri Rangbah ka Jylla u Conrad K Sangma ban leit jurip ha shwa ban trei ïa ka Ropeway ka ban ïaid na Lum Shillong sha Madan Laban.
U la ïathuh ba kane ka jingjurip kan sdang na Lum Shillong namar ïa kane ka Ropeway yn pynïaid na katei ka jaka sha Madan Laban kaba don ïa ka khlaw jong ka tnat Forest.
U la ong lada la dep ka Ropeway kan sa long kawei ka jaka ban khring ïa ki paidbah ban wan kai sha kane ka thaiñ.
Kum ban shu pynkynmaw ïa kane ka Ropeway la buh mawnongrim da ka President ka ri India ka Droupadi Murmu ha u Kyllalyngkot 2024 haba ka wan ïuhkjat ha Shillong.
Ka jingthmu ka Sorkar ban shna ïa ka Ropeway ka long ban khring ïa ki nongjngohkai pyrthei ban wan sha Shillong.
