Shillong, Nohprah 01
Ka jingshna lynti lypa ki nongkitkam ka TMC Nongthymmai konstitwensi na ka bynta ban pynpoi ïa u MLA Bah Charles Pyngrope ban leit phai sha ka Congress kam pat long kaba jem, hynrei kane ka lynti kan suk tang lada ki don ki MLA ki ban ïa phet lang sha ka Congress ha kano-kano ka por.
Kumba ka long mynta, u Bah Charles u la sah marwei ha Nongthymmai konstitwensi namarba kiba ju don bad u naduh ki nongkitkam ka TMC haduh ki nongtrei ki la leit phai noh sha Congress. Kine ki nongïalam ka TMC ha Nongthymmai ki la dep pynkhreh ruh 1500 ngut ki dkhot ki ban rung sha ka Congress hapoh ka konstitwensi.
Wat lada ka lynti la dep shna lypa, hynrei u Bah Charles uba dei ruh u President ka TMC ha Meghalaya, u hap ban ap haduh shwa ka ilekshon ha u snem 2028 ba un ïoh leit phai sha ka Congress.
Ka tyllong khubor ka ïathuh ba ki don ki MLA ka TMC kiba don ha ka jingïakren ban phet noh sha ka Congress katba ki nongïalam ka Congress na Delhi kim pat pyni dak ha kaba ïadei bad u nongïalam ka liang pyrshah, u Dr Mukul Sangma.
Ka tyllong khubor ka ong ba ka lynti kaba suk tam ïa u Bah Charles bad kiwei pat ki MLA ka TMC ban leit phai sha ka Congress ka dei tang lada ki wanlang para maki kum ka kynhun ban leit ïalong kawei noh bad ka Congress ne bad kano-kano ka seng.
Ka rukom long ka saiñ hima-sima ha Meghalaya ka long kaba ym ai jingskhem bad jingshngaiñ ïa ki MLA namar ym lah tip ha kano-kano ka por ki lah ban poi noh sha kawei pat ka seng.
Ka TMC ka don 5 ngut ki MLA kynthup ïa u Bah Charles Pyngrope na Nongthymmai konstitwensi. Ka Congress ka don sa tang uwei u MLA hadien ba phet noh lai ngut ki MLA sha ka NPP ha ka 19 tarik Nailar mynta u snem.
