Shillong, Nohprah 02
Ka Kong Ampareen Lyngdoh kaba dei kawei napdeng ki Myntri ha ka Sorkar Jylla kam shah shuh ïa ki pulit kiba ju synran ïa ka ban pynpah siren haba ïaid sha surok ban leit sha ki prokram bapher bapher namar kam kwah ban pyndom ïa ki paidbah.
Haba ïakren bad u nongthoh khubor, ka Kong Ampareen ka la ïathuh ba mynta ka shim por haduh 25 minit eiei ban poi sha Mawïong Umjapung ban plie ïa ka surok ha Nongneng B kaba la long ha ka Lah Sngi U Blei ka 2 tarik Nohprah, namar ka hap ban ap laiñ bad ki paidbah lada dheng kali.
Ka la ïathuh ba kane ka jingbym treh ban pynpah siren ka la ïaid mynta la shi taïew namar kam kwah ban pyndom ïa ki paidbah namar ki bynñiaw ïa ki nongmihkhmat ban ai siren haba ki ïa beh ïa ka kam jong ki paidbah hi.
Ka la ong ba ha jylla Meghalaya ki don tang 60 ngut ki MLA hynrei ban ai siren ki Myntri Sorkar ki paidbah ki khñium haba ki beh ïa ka kam jong ki paidbah hi.
“Nga kwah dalade ban nym ai siren shuh haba nga ïaid sha surok bah namar nga ïohi ïa ka jingkren bynñiaw ki paidbah hynrei kam ai jingmyntoi ïa nga hynrei ka jingduhnong pat ïa ki paidbah namar ngi poi slem ha ki jingïalang,” ka la ong.
Ka la ong ruh ba ym dei tang mynta shi taïew ban nym ai siren hynrei kane ka la don shi bnai namar kam kwah ban pyndom ïa ki paidbah kiba la kren bynñiaw.
Ha kajuh ka por ka la ong ba ynda phi la mad bad ynda ki la ïoh ban shong ha ka shuki kin sa sngewthuh ïa ka jingkordor ka por namar khlem ka siren kin nym lah ban pyndep ïa ki kam na ka bynta u paidbah.
