Shillong, Nohprah 02
Ka kynhun jong ki nongtrei Anganwadi ha ka Lah Sngi U Blei ki la leit ïakynduh ïa u Development Commissioner bad Principal Secretary ka tnat Social Welfare u Sampath Kumar ban pynpaw ïa ka jingsngewkhia halor ka jingslem ban pyllait ïa ka honorarium.
Katei ka jingpynslem ka la buh ha ka jingeh kaba khraw ïa ki nongtrei Anganwadi kiba don ïa ka bynta kaba khraw ban shakri ïa ka imlang sahlang baroh kawei.
Da kaba shimkhia mardor ïa ka kam, u Principal Secretary u la bthah ïa u Joint Secretary ka tnat Social Welfare ban khmih bniah noh mardor ïa katei ka kam.
Ha katei ka jingkhmih bniah la shem ba ïa ka bhah tyngka na ka bynta ka honorarium haduh u Nohprah 2024 la dep ban bhah sha ki Child Development Project Office (CDPO) katkum ki kyndon treikam. Katba na ka bynta ki bnai jong u snem mang tyngka 2024-2025, ka tnat Finance ka la dep ban pyllait ïa ka pisa kaba donkam sha ka tnat Social Welfare bad ki jingpynkhreh ki la ïaid shakhmat ban pynthikna ba katei ka pisa kan poi sha manla ki CDPO ha ka taïew ba nyngkong jong u bnai Nohprah 2024.
Ban pynthikna ba kane ka jingsiew kan long ha ka por kaba biang, u Myntri Rangbah u la bthah ïa baroh ki jingsiew dei ban pynïaid shakhmat bad ban pyllait noh sha ki nongtrei Anganwadi Worker bad Helper hapoh ka 7 tarik man la ka bnai. Nalor kane, u Joint Secretary yn khmih bniah halor ka jinglong jingman ha ka jingsiew ïa ka Honorarium ha ka 8 tarik man la ka bnai bad ban aiti ïa ka kaiphod kaba pura ban pynthikna ïa ka jingbuh jingkheiñ halor ka pisa.
Da kaba shim lypa ïa ka sienjam ba ka lah ban mih ka jingslem na ki daw ki bym lah kiar, kum ka jingbym don ïa ki nongtrei ha katei ka por ba pynïaid ïa ki kam, baroh ki CDPO ki la ïoh ïa ka jingbthah ba kin wad ïa ki lad ki lynti ban pynkhreh ïa ki jingdonkam khnang ba yn lah ban siew ha ka por kaba dei ïa ka jingsiew.
Ka jingshim ïa katei ka sienjam ka long da ka jingthmu ban pynneh ïa jingai jingkyrshan pisa ïa ki nongtrei Anganwadi ka ban ym don kano kano ka jingthud.
Ka tnat Social Welfare ka la kubur ruh ïa ka jingtrei shitom jong ki nongtrei Anganwadi bad ka ïeng skhem ban pynbeit ïa kino kino ki jingeh ban pynthikna ba kan don ka jingïaid beit ïaid ryntih jong ka kam ha ka jingai jingshakri ïa ka jylla baroh kawei.
