Shillong, Nohprah 02
U Myntri ka tnat Jngohkai ka Jylla uba dei ruh u nongaiktien ka Sorkar MDA-II, Bah Paul Lyngdoh, u la ong ba ka jingpynkynriah ïa ki nongdie madan na Khyndailad kan long hadien ba la phah ka jingpyntip sha baroh ki nongdie madan.
U la ong ba ka tnat Pynroi Sor ka la dep pynshai ba jingeh ba mih ka long, katkum ka hukum jong ka kashari Meghalaya High Court donkam ban ai jingtip (notice) lypa 30 sngi shwa ban pynkynriah.
“Namar ba ngi khlem lah ban ai jingtip shwa jong ka por, ngi khlem lah ban weng ïa ki nongdie madan kumba la thmu ha ka 25 tarik Naiwieng”, u la ong.
U la ong ba kane kan ym shim por bad lehse yn lah ban pyndep hapoh shibnai.
Haba kylli, u Myntri u la ong ba ïa mynta ym pat shym la buh por lano ban pynkynriah ïa ki nongdie madan, hynrei kan ym shim por palat namar ka tnat Pynroi Sor kan sdang noh ban phah ïa ki jingpyntip.
“Ka tnat Pynroi Sor ka la pynpaw ba kan pyndep ban phah jingtip sha ki nongdie madan hapoh 30 sngi, hadien kata ngin sa shim ïa ki sienjam ba bud”, la ong u Bah Paul.
Lah ban kdew ba ka Sorkar ka la thmu ban pynkynriah lut plaiñ ïa ki nongdie madan na Khyndailad bad kiwei ki jaka na sor Shillong sha ki jaka ba la ithuh da ka Sorkar. Pynban na ka liang ki nongdie madan kiba pyrshah ïa kane ka jingthmu ki la pynlong da ka jingïakhih ban leit tur bad pan jingshai na ka shlem treikam jong ka Shillong Municipal Board (SMB) ha u bnai ba la dep nalor ki la pynlong ruh ïa ka jingïakhih da kaba phriang ïa ki mar ki mata ba ki die haduh ka por shiteng miet ha Khyndailad.
Lah ban kdew ruh na ka liang u Symbud Myntri Rangbah ba khmih ïa ka tnat Pynroi Sor, u Bah Sniawbhalang Dhar u la ong ba ka Sorkar kam kyrkieh ban pynkynriah ïa ki nongdie madan namar ba dang donkam sa kumba 4-5 tylli ki jaka ban hap wad na ka bynta ban pynkynriah ïa ki nongdie madan bad ha shwa ban pynkynriah ruh un sa khot jingïalang bad ki tnat ba dei khmih kumjuh ïa ki nongmihkhmat jong ki nongdie madan.
