Jowai, Nohprah:
U Bah Marcus M Thaiang uwei na ki nongthoh kot na Rilum Jaiñtia bad u nongïaleh ba khlem shongthait ban wanrah biang ïa ka Elaka Labang Nangphyllut & Pangam Raliang (Block- I) sha Jaiñtia Hills Meghalaya, u la thoh bad pynmih ïa ka kot kaba u ai kyrteng ‘The Cry of the People of Labang Nangphyllut” kaba la thoh ha ka ktien phareng.
U nongthoh ha kane ka kot u la batai bniah shaphang ka Elaka Labang Nangphyllut bad ki briew kiba shong ba sah ha ka bad ïa ka hok long trai man trai jong ki Khasi Pnar kiba shong ba sah ha kane ka thaiñ halor ka khyndew ka shyiap u pud u sam.
Ïa ka jingkhlad jubor bad jingpynhap jubor ïa kane ka Elaka shapoh United Cachar & Mikirs Hills ha ka por ba thaw ïa ki District Councils ha ka snem 1951. Ka jingpyrshah ki briew jong kane ka thaiñ ïa kane ka jingleh donbor jong ka Sorkar Assam.
Ka jingshah lehbeiñ ki Khasi Pnar ha ka Sorkar Assam bad ha kiwei pat ki jaidbynriew. Ki jingthoh kiba ki briew kane ka Elaka ki ai sha ka Sorkar Meghalaya, Assam bad Sorkar India. Ki jingïalang bad jingïakren jong ki ar Sorkar Meghalaya Assam halor kane ka kam re-transfer ïa ka Block-I & II bad ki correspondences kiba une u nongthoh u la ïoh na ka Sorkar.
Namarba kane ka kot ka dei shaphang ki Labang Nangphyllut Dolloiship, kumta ruh ïa kane ka kot la pyllait paidbah da u Acting Dolloi Elaka Labang Nangphyllut Prolin Samaiang ha ka 29 tarik Naiwieng ha Jowai. Kane ka long ruh ka kot kaba 18 kaba la thoh bad pynmih da une u nongthoh.
Kane ka kot ka long shisha ka jingtip bad ka jingmyntoi kaba khraw ïa ki paid nongshong shnong jong ka Ri Khasi Jaiñtia bad khamtam ïa kito kiba don ka jingmut bad ka mynsiem ban ïeng ïaleh ban pynïoh ïa ka hok ki paid Khasi Pnar jong kane ka thaiñ bad ban wanrah biang ïa kane ka Elaka sha Jaiñtia Hills District Meghalaya, la ong u Acting Dolloi Elaka Labang Nangphyllut Prolin Samaiang haba kren ha ka jingïalang.
Ïa kane ka kot la shon bad pynmih da ka Ri Khasi Publication, Mawkhar Shillong bad la sam ruh da ka Ri Khasi Book Agency Mawkhar Shillong. Kane ka kot ka don 136 sla bad ka dor ka long tang T.300. Lah ruh ban ïoh na kane hi ka Book Agency lane na une u nongthoh na Mookyrdup Jowai bad kiwei kiwei ki jaka die kot kiba don ha Khasi Jaiñtia.
