Shillong, Nohprah:
Ka Hotel Polo Towers Shillong da ka sngewkmen kaba khraw ka la ïoh ban plie paidbah ïa ka jaka bam-jaka dih ïa kaba la tip kyrteng kum ka ‘Tring Tring’ ha ka 29 tarik u Naiwieng 2024.
Kane ka ïing-basa ka don hapdeng jong ka sor Shillong. Kane ka dei ka jaka bam kaba kham kyrpang kaba la wanrah biang ïa ka jingsngew jong ka por ha ki snem 1990 shaneng, kaba don ïa ka jingitynnad jong ka por u mynbarim bad ka jingitynnad ka juk mynta.
La shna bad pynwandur ïa kane ka jaka bam-jaka dih ha kata ka rukom kaba pynshohbiej shi kat dei eh ïa ki nongwan bam ha kane ka jaka bam.
Ka ‘Tring Tring’ ka heh haduh 3,200 square feet kaba la saiñ dur bha, bad pynlong ïa kane ka jaka kum kawei na ki jaka ban khring ïa ki briew kiba na kane ka jaka bad na shabar ruh ba kin wan ban mad bad bam ïa ki jingbam napoh kane ka jaka bam.
Hapoh ka ‘Tring Tring’, ki nongwan bam ki lah ban sngew kynmaw biang ïa ki por ba la dep, ha kaba kan don ka jaka phone ne ki ‘telephone booth’ kiba la rim bha kiba shu pynshad pyllun ban ñion ïa ki nombor ka ban biang bha na ka bynta ban shon ïa ki dur ban buh ha ki rynsan social media kum hapoh ‘Instagram’ bad kiwei-kiwei.
Yn lah ban shong haduh 150 ngut ki nongwan bam, ha kaba ki nongwan bam ki lah ban jied ïa ka jaka kaba kyrpang bad kynjah, ka bar, ha verandah ban peit ïa ki lum ha Shillong bad ha kane ka jaka bam-jaka dih, ki paidbah ki lah ruh ban pynlong ïa ka khawai-dawai.
Ka thup bam-dih ne ka ‘menu’ jong ka ‘Tring Tring’ ka long kaba la khleh lang ïa ki jingbam trai ri bad kiba na bar ri ruh kaba don ha ka ïa ki jingshet ba la shet na kiei-kiei kiba lah ban ïoh katkum ka aïom. Ka don ruh ïa ka ‘cocktail’ menu kaba kham kyrpang ïa kaba la khleh da ki nongkhleh ba tbit bad don ïa ka cocktail ba kyrpang kata ka Taste of Shillong, Leaves & Bud, Butterfly Effect, 0364, Data Roaming, The Landline, bad Trunk Call. Ïa kine ki jingdih lah ban dih ryngkat ki jingbam kiba bang kum ka Crispy Goat Cheese Salad, Mushroom Cappuccino, Pistachio Basil Pasta, Tomato & Asparagus Risotto, bad Grilled Fish kaba don bad ka Caper Butter Sauce.
Haba kren ha ka sngi ba la plie paidbah, u Deval Tibrewalla, CEO bad Director ka Hotel Polo Towers Group, u la ong, “Ha kine ki snem ba la dep, ka Hotel Polo Towers kam dei tang kum kawei ka jaka ba lah ban leit kai- kadei ka jaka kaba don ïa ka khana jong ka jingitynnad jong ka thaiñ Shatei Lam Mihngi, ka riti dustur, bad ki matti jong ka. Ngi sngewtynnad ban wanrah sha phi ïa ka ‘Tring Tring’ hapdeng jong ka Nongbah Shillong. Kane ka jaka bam kaba plie baroh shisngi bad ka jaka dih cocktail kam dei tang ban rakhe ïa ka riti dustur bad ka kolshor jong ka sor hynrei ka dei ka jaka kaba nang lah shuh shuh ban ïa kane ka jingriewspah ryngkat ki jingitynnad jong ka por barim. Ngi khot sngewbha ïa baroh ban wan ban ïoh mad ïa ka jing-itynnad ïa ka ‘Tring Tring’ ha ka jingïaid lynti kaba kmen jong ngi”.
U Deval u la ong ruh ba mynta ka Hotel Polo Towers ka don ïa 9 tylli ki Hotel ha baroh kawei ka Ri India ha kaba 6 tylli ki don hapoh ki Jylla shatei lam-mihngi ka Ri bad ka Hotel Polo Towers kaba don hapoh ka nongbah Shillong ka dei kaba nyngkong eh na kitei ki Hotel.
“Ngi la sdang nangne napoh Shillong, kumta ngi la khot da ka kyrteng Polo Towers namar ngi don ha ka madan Polo bad ka la pynlong ïa ngi ba ngin don syndon da ka Polo Towers Group bad sha baroh ki ‘Hotel’ ruh la ai kyrteng da kajuh ka kyrteng”, ong u Deval.
U la ïathuh ba ka jingsdang jong ka ïing-ka sem jong u ïa ka Hotel Polo Towers napoh Shillong ka dei namar ba naduh ki kpa tymmen-kmie tymmen jong u, ki dei kiba la kha-la heh hapoh Shillong.
Ka dei ka jaka na ka bynta ban sakhi ïa ka riti dustur bad kolshor ka Shillong, bad ha ka ‘Tring Tring’ yn pynlong ruh ïa ki jingtem jingput, bad kiwei kiwei ki jingpynbyrngia ban pynkupbor ïa ka jingriewspah ha ka liang ka tem ka put ka ban pynkupbor ïa ka tem ka put kaba paw jong ka sor Shillong kiba long naduh ki retro beat haduh ki rukom tem kiba jai jai da ki nongtem kiba na kane ka shnong.
