Nongstoiñ, Nohprah 02
Ka jingkynrei jong ki kam tuh kam thiem da kaba lied ïa ki dukan bad kiwei kiwei ki dang ïai bteng bad jia na kawei ka sngi sha kawei pat. Kum kine jingjia ki la ktah shisha ïa ki trai dukan kiba im sngi ban bylla na kane ka kam.
Katkum ki tyllong khubor ba la ïoh lum kane ka la jia ruh ha ki bynta jong ka ïew Rambrai, ha kaba la ong ba san tylli ki dukan ba kynthup ïa ki dukan jaiñ bad juti ki la shah lied bad shah tuh ha ki briew ki bym shym la tip ki dei kiei.
Na ka liang jong ki trai dukan ki la ïathuh ba la suba jur ba katei ka jingshah lied ki dukan jong ki ka lah ban dei ha ka miet jong ka Sngi U Blei katba ma ki pat ki lap ha ka step jong ka Lah Sngi U Blei ka taïew hadien ba ki dang thmu ban leit plie dukan hynrei ki la lap pynban ba ki dukan ki jong ki, ki la shah pied bad rong tuh ïa ki tiar ki tar na ki dukan.
Shuh shuh ki la ïathuh ruh ba katei ka jingshah tuh bad shah lied jong ki dukan ka la ïai jia na ka por sha ka por. Kumta na ka liang jong ki hi ki pynpaw ïa ka jingsngewkhia bad ka jingkyndit hadien ba ki wan mynstep ki lap ba la shah pied ki dukan ha kaba ki la duh noh ïa ki tiar ki tar, ki jaiñ ki nep bad kiwei kiwei. Ki la kyntu ruh ïa ki bor ba halor, kum u Syiem, ka Shnong ba kin shimkhia lem halor kane ka jingkynrei jong ka jingshah tuh kaba la bteng na kawei ka por sha kawei pat.
