Nongpoh, Nohprah 02
Kum shibynta ban snohkti lang bad ka pyrthei ha ka jingrakhe ïa ka ‘World Aids Day’, ka shlem treikam District Integrated Strategy for HIV/AIDS (DISHA), Nongpoh lyngba ka jingkyrshan da ka Meghalaya AIDS Control Society (MACS), Shillong ha ka 2 tarik Nohprah ki la rakhe ïa ka ‘World AIDS Day’ halor ka phang “Take the Right Path” ïa kaba la pynlong ha ïingdorbar Laban Saro Umroi Ri Bhoi District.
Ha kane ka sngi la wan ban shimbynta bad sakhi lang da u Bah Damanbait Lamare, MLA Umroi kum u kongsan ha ka jingdon ryngkat u Bah Rangkynsai Kharbuki MDC Umroi, ka Dr. A Kharduid DMHO Ri Bhoi District Nongpoh, ka Dr. E Kalwing District AIDS Control Officer, Ri Bhoi District, ha ka jingdon lang ki nongïalam shnong, ki nongïalam Balang, ki nongïalam Seng Samla, ki ophisar bad nongtrei na ka tnat ka koit ka khiah lem bad kiwei kiwei.
Haba kren ha kane ka sngi, u Bah Damanbait Lamare u la kyntu ïa ki paidbah ba ha kum kine ki sngi ki dei ban long kiba phikir ïa la ka jong ka jingim da kaba ki long adkar ha kiei-kiei khnang ba kin lait na kine jait jingpang. U la ong ruh ba ki briew kiba don ïa une u khñiang jingpang kim dei ban shah ibeiñ ne shah ñiewbeiñ ha ka imlang ka sahlang ne wat ha ki bahaïing bahasem.
Ha kane ka sngi na ka liang ka tnat ka koit ka khiah ki la pynlong ruh ïa ka Free Medical Check-up and Screening Camp ne jingai jingsumar ei sha ki paidbah.
