Shillong, Nohprah 03
U President ka All India Trinamool Congress (AITC) u Bah Charles Pyngrope u la kubur ba baroh ki nongïalam bad ki nongbud jong u ki la leit phai sha ka Congress bad um lah leh ei ei namar um lah khang ïa ki.
Kane ka jingpynpaw u Bah Charles ka dei haba jubab ïa ka jingkylli ki nongthoh khubor ha ka Sngi Ba-ar halor ka jingleit phai lut ki nongïalam bad nongtrei jong u sha ka Congress ha Nongthym-mai konstitwensi.
“Ngan leh kumno haba baroh ki la leit phai (sha ka Congress), ngam lah ban khang ïa ki,” la ong u Bah Charles.
Haba kren shaphang ka Congress bad ka jinglong jingman ka seng, u Bah Charles u la ong ba u wat lada u la phet na ka Congress, hynrei naduh basdang ha u snem 2022 u la dep pynpaw ba ka lieng jong ka Congress kam ngam satia, hynrei ka shu donkam ïa u maji (captain) ba biang.
U Bah Charles u la don bad ka Congress la bun phew snem, hynrei mynta u la don bad ka TMC ha kine ki lai snem tam.
“Nga la don kumba 30 snem bad ka Congress nga tip ïa ka riti treikam kynthup ka jingjied ïa ki nongkitkam ka seng ha Jylla. Mynshwa ka ju don ka jingjied ïa u President da ki dkhot kiba mihkhmat na man la ki Block ne konstitwensi bad ha ka por jong u Bah OL Nongtdu la jied ïa u kum President ka MPCC ha ka ilekshon bad nga ruh nga shahjied kum u Treasurer ym ba shah thung (nominate),” la pynkynmaw u Bah Charles.
Hynrei u la ong ba mynta la bun phew snem ba ym don ilekshon shuh hynrei la shu thung ïa ki nongkitkam naduh u President.
U la ong ruh ba lada bud ryntih ïa ki kyndon ne riti treikam yn nym don ba khñium ne ud ïano-ïano bad ka long kaba donkam ban bud ïa ki kyndon.
